Anders Fogh Rasmussenip saassussineq assuaraa
Anders Fogh Rasmussen oqarpoq qaartartumeerineq aallartitaqarfimmut saassussinerusoq taamaalillunilu Danmarkimut saassussinerusoq.
Qaartartumeerineq aamma USA-p præsidentiata assuaraa, præsidentillu oqaasetartua, Dana Perino oqarpoq peqqarniiserneq illersorneqarsinnaanngitsoq.
Qaartartumeerinerup kinguneranik inuit ikinnerpaamik arfinillit toqutaapput ikilerneqarsimasullu 35-t napparsimavinni passunneqarlutik.
Tusagassiortoq Puk Damgård Andersen Islamabadimiittoq oqaluttuarpoq inuit annilaarsimaqisut.
Eqqorniarneqartut eqqornagit Pakistanimiut pisoq imminnut sunniuteqarnerlussammat erloqissutigaat.
Siullermilli Muuamaat illaruaatigalugu titartakkat saqqummermata, minnerunngitsumillu aappassaanik aviisinit naqinneqarmata, aallartitaqarfiup saassunneqarnissaa ilimagineqartuarsimavoq. Taamaammat taama sillimaniarluni iliuuseqartoqartigisoq, qanoq ililluni biilit qaartinniakkat aallartitaqarfiup silataani unitsineqarsinnaasimanersut eqqumiigineqarpoq. Politiilli oqarsimanerarneqarput naalagaaffiit aallartitaasa biiliisut biilit normuisa allagartaat aappalaartuummat pasitsaanneqarsimangitsut, biilillu tamarmik misissorneqarsinnaanngimmata sillimaniarsinnaaneq killeqartoq.
Danskisut innuttaassusilik Pakistanimiunit kingoqqisoq ajunaartunut ilaasoq, Danmarkip Pakistanimut aallartitaata Michael Hjortsøp nutaarsiassaqartitsivimmut Ritzau-imut unnummut nalunaarutigaa.
