Anders Fogh Rasmussen: Utoqqatsertoqaqqittoqarnissaa ilimagissanngilarsi

Namminersorneq pillugu isumaliutissiissutip atsiorneqarnera tusagassiortunik katersortitsinermut pissutaangaluartoq, tusagassiortut ilaata tupaallatsitsilluni Canadami naggueqatigiit Inuit Eqqillillu pinngitsaalineqarlutik najugaqarfiutigalutik atuarfinnut inissinneqartarsimasut, atornerlunneqartarsimasullu naalakkersuisunit utoqqatserfigineqarnerat, Hans Enoksenip qanoq isumaqarfigineraa, Danskillu naalakkersuisuiniit Kalaallit utoqqatserfigineqaqqinnissaat piumasarineqassamaarnersoq apeqqutigaa. Namminersornerullutik Oqartussat pisortaat, Kaj Kleist maannakkut Danmarkimeeqataasoq taamatut oqarpoq.

Apeqqutigineqartumut Hans Enoksen akivoq, nunasiaanerup nalaani nunaqarfimmiorpassuit pinngitsaalineqarlutik nuutsitaasarsimasut utoqqatserfigineqarnikuunngitsut tarnimikkut suli anniaateqartut, tamakkuli Danskit naalakersuisuisa isummerfigisassarigaat.

- Danmarki danskillu sunnguamilluunniit Kalaallit Nunaanni pisimasut pillugit kanngusutissaqanngilaq, akerlianilli Danmarki inuiaqatigiinnut Kalaallinut, ineriartornermullu tupinnaannartumik tunniussaqarnikuuvoq. Tamakku angusavut inuiannut allanut maligassiuinerit tanngassimaarutissaraavut, ministeriuneq oqarpoq.