Anders Fogh Rasmussen-ip ministerissat nutaat nalunaarutigai
Anders Fogh Rasmussenip Karen Jespersen imminut tunniusimalluni inunnik ikiortariaqartunik sullissiniartartoq oqaatigeqqaarpaa, arnallu atugaat soqutigisarimmagit aamma Naligiissitaanermut ministeritut tulluartuusoq oqaatigalugu.
Tulliullugu Eva Kjær Hansen, Inunnik Isumaginninnermut ministeritut tunuarluni Inuussutissaqarnermut ministerinngortoq ilisaritippaa, oqarluni Eva Kjær Hansenip inuit ikiortariaqarluinnartut pimoorrullugit unneqqarilluni sullittarai, Inuussutissaqarnermullu ministerinngortinnera nikaginninnertut isiginagu akerlianilli qutsavigaa ministereqarfimmut allamut nuunnissaminut akuersaarsimammat. Kingulliullugu ilisaritippaa Angallannermut Nukissiorfeqarnermullu ministerinngortoq, Jakob Axel Nielsen, ilaatigut Konservativet akileraartarneq pillugu oqaaseqartartuattut piffissaq sivisunngitsoq atorlugu politikeritut suleqatikkuminartutut malunnaateqarsimanerarlugu. Nangilluni oqaatigaa Jakob Axel Nielsen ukiap ingerlanerani oqimaatsunik suliassaqartoq, minnerunngitsumik akileraartarneq pillugu isumaqatigiinniarnissaq eqqarsaatigalugu. Naggasiullugu Anders Fogh Rasmussenip maannakkut ministerinik nikititerinerminut pissutaasoq ukiap ingerlanerani isumaqatigiinniarnissat oqimaassaqimata isumaqatigiinniartussat tutsuiginartuullutillu aalajaattuusariaqarnerat.
Inunnik isumaginninnermut ministeringortoq, Karen Jespersen, danskit politikkikkut oqaluttuarisaaneranni siullersaalluni Folketingimi talerperliit saamerliillu sinnerlugit ministeriusimasutut aamma taasinnaalerpoq.
Københavnip Universitetiani Naalagaaffik pillugu ilisimatusarnermut ittuusoq, Lars Bille, oqarpoq saamerliit talerperliillu sinnerlugit siornatigut ministeriusoqarnikuunnitsoq.
- Ministeriusimasut tamaasa misissuiffigigaluarakkit Karen Jespersenitut iliortoqarnikuunngilaq. Gustav Rasmussenimik atilik 1945-miit 1950-mut Venstre-t Socialdemokratillu sinnerlugit Nunanut Allanut ministeriusarsimavoq, taannali assersuunneqarsinaanngilaq ilisimasani pissutigalugit ivertinneqartarsimammat politikki aalajangersimasoq pissutiginagu, Lars Bille oqarpoq.
