Anders Fogh Rasmussen eqqartuussisunut tunniunneqassanersoq aqagu paasinarsissaaq
Irakimi sorsunnermut akerliusut arlallit Østre Landsretimiit aqagu paasissavaat, ministeriuneq Anders Fogh Rasmussen eqqartuussisunut tunniussinnaassanerlugu.
Eqqartuussivimmut suliassanngortitsiniartut 26-usut isumaqarput, danskit sakkutuui 2003-mi sorsukkiartinneqarmata, ministeriunerup Inatsisit Tunngaviusut unioqqutikkai.
Suliassanngortitsisunut ilaapput, Bjarne Olsen Kirkmandip angajoqqaavi, taanna Irakimi aqqusernup sinaani qaartartumeerisoqarneratigut 2005-imi toqutaavoq.
Suliassanngortitsisut eqqartuussissuserisuat, Bjørn Elmquist, isumaqarpoq, angajoqqaat ministeriunermut suliassanngortitsinermikkut eqqartuussisutigut immikkut soqutigisaqartut, tassami ernerat Irakimi toqutaammat.
Naalagaaffiit Peqatigiit aalajangersagaat, naalakkersuisunit sorsunnerup unioqqutitsisuunnginneranik innersuussutigineqartartut, Bjørn Elmquistip aamma akerlilerpai. Tassami Naalagaaffiit Peqatigiit taamanikkut qullersaata, Kofi Annan-ip, oqaatigereerpaa, Naalagaaffiit Peqatigiit isumaqatigiissutaat naapertorlugit Irakimik saassussineq unioqqutitsinerusoq.
Eqqartuussissuserisoq Peter Biering, danskit naalagaaffiata eqqartuussissuserisuineersoq, ministeriunermut illersuisuusoq oqarpoq, eqqartuussisunut suliassanngortitsiniarneq takoqqusaarnerinnaasoq.
