Anders Fogh Rasmussen: Amerlanerussuteqartut isumaat malipparput

Ministeriunerup Anders Fogh Rasmussenip, Naalakkersuisut siulittaasuata Hans Enoksenip aamma Savalimmiuni lagmandip Joannes Eidesgaardip ullaap tungaagut naapeqatigiinnerminnut atatillugu tusagassiortunik katersortitsinerminni arferit pillugit Danmarkip isummertarnera eqqartukkat ilagaat.

Imartamik arferit eqqissisisimatinneqarfissaannik pilersitsinissamut folketingimi amerlanerit illersuipput, illersuisullu folketingimi ilaasortat Atlantikup Avannaani Suleqatigiit suleqatigisarereerpaat.

- Taamaammat nammineq folketingimi partiit suleqatigisasi sunnerniartariaqassavasi. Amerlanerussuteqartut eqqissisimatitaqalernissamut isummernerat uanga Arfanniarneq pillugu Ataatsimiititaliarsuanut IWC-mut apuupparaa, naalagaaffeqatitta arfanniartartut isumaannut akerliuppat soorunami tamanna ajuusaarnarpoq. Kaammattuiinnarsinnaavunga aaappaagu taasissutiginnginnerani Savalimmiormiut kalaallillu suleqatimik isumaannik allanngortitsiniaqqullugit, Anders Fogh Rasmussen oqarpoq.

- Soorunami naalagaaffeeqqat piujuaannartitsinissaq tunngavigalugu arfanniartut illersortuassavagut. Taamaammat-una EU-mi nunat annerit isumaannut akerliusumik Danmarkimi inissittartugut, Fogh Rasmussen nangippoq.

Savalimmiuni lagmandi Joannes Eidesgaard, Socialdemokratit siulittaasuannut Helle Thorning Schmidtimut saaffiginnissanerarpoq.

Hans Enoksen aamma Socialdemokratinik uparuaavoq, oqarluni Danmarkimi naalakkersuisut Kalaallit Savalimmiormiullu isumaannut akerliusumik iliortarnerat naammaginanngitsoq.

Naalagaaffeqatigiit siuttuisa naapinneranni aamma eqqartorneqarpoq Kalaallit Nunaata Namminersorneq pillugu inatsisissaa, ukiaru taasissutigineqartussaq. Savalimmiut nunanut allanut politikkeqarnermut tunngatillugu taaneqarsimanertik ippigaat. Taaneqarnertik Savalimmiut Danmarkillu siunissami suleqatigiinnerannut ajoqutaasinnaasoraat.

Tamannali ippinnartoqanngitsoq Anders Fogh Rasmussenip erseqqissaatigaa.