Anders Fogh neriorsuutiminik eqqortitsisimannginnerarneqarpoq

Danmarkimi ministeriunerusimasoq, maanna Natop pisortaa Anders Fogh Rasmussen, nittartakkap WikiLeaksip allakkani isertuussani saqqummiussaani nutaani qitiusumik inissisimavoq.

Allakkiani isertuussani ippassaq saqqummiunneqartuni Tyrkiap, Foghip Natop pisortaatut atorfinitsinneqarnerminut atatillugu neriorsuutiminik eqqortitsisimannginnerarpaa.

Tyrkiamiut Foghip atorfinitsitaaneranut akuersinerminnut tunngavigisimavaat, Foghip neriorsuutigisimammagu tullersortimisut atorfinitsinneqartussaq Tyrkiamiuussasoq.

Taamatut neriorsuinerup piviusunngortinneqannginnera, Tyrkiamiut Amerikamiut nunanut allanut ministeriata tullersortaanut William Burns-imut, februaarimi ataatsimiinnermi naammagittaalliuutigaat. Tassami Natomi qullersap tulliatut atorfik Tysklandimut tunniunneqarmat.

Fogh pillugu ataatsimiinnermit imaqarniliaq, allakkiat isertuussat WikiLeaksimit ippassaq saqqummiunneqartut ilagaat.

Allakkiani isertuussani ilaatigut paasinarsivoq, Amerikamiut atorfilittaasa nunani allamiut qullersaannik kusananngitsunik Washingtonimut nalunaaruteqartarsimanerat.

Frankrigimi præsidenti Nicholas Zarkozy "kaasarip atisartaavinik atisalittut" oqaatigineqarpoq, Italiami ministeriuneq Berlusconi tassaanerarneqarluni atorsinnaanngitsoq, perruukujuttoq festernissamillu nuannarisalik aamma Tysklandip forbundskansleria Angela Merkel isumassarsiorsinnaanngitsutut oqaatigineqarluni.