Anders Fog NATO-mi qullersanngoratarsinnaavoq

Danmarkip ministeriunerata Anders Fog Rasmussenip Nunat Killiit Illersoqatigiiffiannut, NATO-mut, qullersanngornissaanut tusatsiakkat imaaginnavipput, ippassarlu sakkortuseriaannarlutik.
Allattoq Mads Lynge
marsip 22-at 2009 13:34

Anders Fog Rasmussenimut tapersersuinini takutinniarlugu USA-p isumannaallisaanermut siunnersortaanerata Danmarkip ministeriunera ippassaq ataatsimeeqatigaa.

Tuluit nutaarsiassaqartitsiviata Reutersip nittartagaani tamanna atuarneqarsinnaavoq.

Anders Fog Rasmussenip NATO-mi qullersanngornissaa taamaalilluni qanilleriaannarpoq. Tyskland, Frankrig aamma Tuluit Nunaat Anders Fog Rasmussenimik tapersersuinertik nalunaarutigereerpaat.

Reuters naapertorlugu NATO-mi atorfillit nuimasut Barack Obamallu qullersaqarfianeersut Anders Fog Rasmussenimik tapersersuipput.

- Anders Fog Rasmussenimik tapersersuiniartut amerliartortut malunnarpoq, atorfillit marluk atersineqanngitsut Reutersimut oqarput.

NATO-mi qullersaq nutaaq kingusinnerpaamik apriilimi toqqarneqartussaavoq, NATO-mi ataatsimeersuartoqartussaammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq