Andala Frankrigimi soqutigaat
Nuka Godtfredsenip nangeqattaartunngorlugu titartagarisartagaanik, Andalamik, nuannarisallit, titartakkat kalaallisut danskisullu oqaasertallit nutaat saqqummersinneqarnissaannut qilanaarsinnaanngorput. Københavnimi kulturikkut unnussiornermi, oktobarip ulluisa 13-anni pisussami, saqqummersitsisoqassaaq.
Titartakkat ilamerngi Kalaallit Illuutaanni Løvstrædemi kulturikkut unnussiornissap tungaanut takusarneqarsinnaapput. Nuka Godtfredsenip uuliamik qalipaaserluni nunatsinni pinngortitaq ilaarlugu titartagaasa kusanartorsuit killinganni titartakkat nangeqattaartut nivingatinneqarput.
Titartakkanik saqqummersitsinermi alakkaasut aamma meeqqat atuagassaanik nutaamik qupperaasinnaapput. Atuagaq ”Andalaaraq ikinngutaalu” Lisbeth Valgreenimit atuakkiaavoq, Nuka Godtfredsenimillu titartagalersugaalluni.
Franskit titartakkanik nangeqattaartunik nuannarisallit Andala siunissami immaqa ilisimalissaqaat. Nuka Godtfredsenip ullumi ilisimatitsissutigaa, Andala franskisut oqaasertalik saqqummersissallugu Frankrigimi soqutigineqartoq.
