ANC-p siulittaasussarsiornera pissanngatigineqarpoq
Afrikami Kujallermi naalagaaffiup præsidentia Thabo Mbeki partiimi naalakkersuisuutitaqartumi siuttuunerminik uppititseriaraluartunut ullumikkut akissuteqarpoq. Nalunaaquttap akunnerini pingasungajanni oqalugiarnermini ileqqorissaartunik siuttoqarnissaq piumasaraa.
Tamanna unammillertiminut, ANC-mi siulittaasumut tulliusimasumut, Jacob Zuma-mut tunngatippaa. Nuannarineqaqisoq Zuma, naalakkersuinermut tunngasunik ataatsimiittoqartillugu qitinnermik nuannarisalik 2005-imi tunuartitaavoq, matumani unnerluutigineqarluni angerlarsimaffimmini arnamik inuusuttumik pinngitsaaliilluni arnerisimasutut aamma aningaasanik pinerluuteqarnermi qitiusumik inissisimaneragaalluni. Zuma pinngitsaaliilluni arnerisimasutut pinngitsuutitaavoq, aningaasanilli pinerluuteqarsimasutut unnerluutigineqarnera suli aalajangiiffigineqanngilaq.
Taamaakkaluartoq 65-inik ukiulik Zuma Afrikami Kujallermi naalagaaffimmi, ingammik qernertumik amilinnit pissakinnerusunit nuannarineqaqaaq. Tapersersortigilluagai tassaapput ANC-p arnartai, inuusuttut sulisartullu peqatigiiffiinik ingerlatsisut.
Mbeki ANC-mi siulittaasuuginnassanersoq aqagu nalunarunnaassaaq, tassami aqagu ullumi qinersinerup inernera tamanut saqqummiunneqartussaammat.
Siornatigut Afrika Kujallermi naalagaaffiup præsidentia Nelson Mandela ullumi oqarpoq partiip 1991-imiit 1997-imut siulittaasuuffigisami avissaartuuffiunera aliasuutigigini.