Anaanaq pakatseqqasoq: Politiinit upperiumaneqanngilagut
Maannali anaanaq oqaluttuarpoq, ilaquttaminnik kinguaassiutitigut kanngutsaatsuliorsimaneraalluni paninilu marluk nalunaaruteqaramik politiinit upperiumaneqarsimanatik.
Taanna suliap ilungersunarnera pillugu kinaassutsiminik isertuusserusuppoq.
- Artornarsimaqaaq, politiimmi isigaakka, ilungersunartumik pisoqarnerani ikiuerusuttutut, taamalu isigiuunnarsimallugit.
Panimmi angajulliup piffissami sivisuumi kinguaassiutitigut kanngutsaatsuliorfigineqartarsimanerarluni ukioq kingulleq oqaluttuummani tamanna politiinut nalunaarutigisassaasoq nalornissutigisimanngilaa.
Aamma atuaruk Aviâja Egede Lynge: Ajornartorsiut aaqqiivigiineqartariaqarpoq
Ataasiaannaq apersorneqarpoq
Pania Nuummi politiinit apersorneqarpoq, suliarlu illoqarfimmi kanngutsaatsuliorfiuneragaasumi politiinut nassiunneqarpoq.
- Nukatsitatut isigigaat, misigisimavunga. Ilaatigummi oqarput, panimma mikisuunermini akkani kamaassimassagaa taamaalillunilu akiniaaniarsimassasoq. Panigali taamaattuunngilaq.
Pania illoqarfimmi peroriartorfigisimasamini politiinit apersorneqanngitsorluunniit suliaq unitsinninnarneqarpoq, politiimmi isumaqarput uppernarsaatissakippallaartoq.
Taavali pania nukarleq peroriartorfimmini tikeraarnermini ilaqutaasumit taassuminnga kinguaassiutitigut kanngutsaatsuliorfigneqarsimanerarmat, anaanaasup tikeraarfimminni politiinik upperinnissinnaanera killeqaqaaq.
- Paniga nukarleq aqqutigalugu eqqartuussaatitsiniartutut pasillerneqarnissara annilaanngassutigisimavara.
Angajoqqaat arlallit politiit sulinerat pakatsissutigisarpaat
Angajoqqaatulli taama misigisaqarsimasuni kisimiinngilaq.
Meeqqat pisinnaatitaaffii pillugit suliniuteqartumi MIO-mi angajoqqaanik pakatseqqasorpassuarnik saaffigineqartarsimallutit KNR-mut uppernarsaavoq.
- Tassa ajoraluartumik naapittarparput politiit oqarsimatillugit uppersaateqartoqanngittoq taava iliuuseqaqqittoqarneq ajortoq.
Meeqqat illersuisuat Aviâja Egede Lynge taama oqarpoq, aammalu kommuni saaffiginnissutit imarisaannik misissuisimanngikkaangat saaffiginnittoqartartoq eqqaallugu.
Naak nukarliup kanngutsaatsuliorfigineqartarsimaneragaaneranik politiit suli misissuigaluartut, politiit suliaminnik iluamik suliarinninnersut, anaanaasup upperinngilaa.
- Suliap ingerlanneqarallarnerani pinerlutsaalisitsinermik suliaqartunut upperinnippallaanngilanga. Neriuppungali panikka taakkunannga ikiorneqassasut.
Suliat ilungersunartutut suliarisarpavut
Kalaallit Nunaata Politimesteria Bjørn Tegner Bay suliamut tassungarpiaq tungasumik oqaaseqarsinnaanngilaq. Kisianni angajoqqaat suliat ilungersunartut pillugit politiinut saaffiginnissutaat pillugit, politiit misissuinermi iluatsitsinngitsooraangata, angajoqqaat pakatsisarnerat, KNR-mut paasilluarsinnaanerarpaa.
Kinguaassiutitigulli kanngutsaatsuliorfiginninnerit politiinit suliassatut ilunngersunartutut tiguneqartartut naqissuserpaa, akerlianilli misigisaqaraanni, politiit qullersaqarfiannut saaffiginnittarnissaq kaammaattuutigaa, taakkua qanoq iliuuseqassammata.
