Anaanaq: Ilaqutariinnut pikkorissartitsineq iluaqutigaarput

40-nik ukiullip Marie Johansen Berthelsenip ikiortariaqarnini siorna aatsaat paasivaa, Nuummilu ilaqutariit pikkorissartinneqarnerannut angutaatitaanilu peqataallutik.

- Taamanikkut annerusumik kamak, kamaqartarsimavunga allaat meeqqannut aappannullu tujormisitsisinnaallunga, anaanaq aallartippoq.

Meeqqat tujormillutik ilaanni qullisunnguullutik atuariartortarnerarpai, ullussaat sequmeriivittarlugu pisarsimallugit.

- Kamak suminngaanneersoq sivisoorujussuarmik nalusimavara. Pikkorissareeratta ujartuinitsigut meeraaninninngaanniit aallaaveqartoq paasivara. Naak oqarsinnaagaluarlunga meeraalluta ilaqutariinnitsinni ajortoqarata, ilaa? Kisianni uanga qamuuna tappiiffigisimavara, oqarpoq.

Tappiiffigisimasani tassaanerarpaa qatanngutituami animi inuusuttuutillutik toqukkut qimagunnera suliarinngitsoorsimasani.

- Angajoqqaama apersortarpaannga akissutinnaarisimavarali – ajortoqanngilanga – sunaaffa ajortoqanngitsuusaartarlunga, uffa asanninneq amigaatigalugu, nassuiaavoq.

Marie Johansen Berthelsen aappanittarsimagaluarpoq qimattarlugilli.

- Soorunami nuannersoqartaqaaq, kisianni tujorminerit amerlanerusimapput – paatsooqatigiinnerit, immitsinnut tujormisaarunnerit, oqaloqatigiissinnaannginnerit. Allaammi eqqarsartarnikuuvunga ajortoqassaaq-aasiit, uffa suli pisoqanngitsoq, nangippoq.

Marie Johansen Berthelsen aappanilu ilaqutariinnut pikkorissartitsinermut sapaatip-akunnerinik marlunnik sivisussusilimmut 2008-mi apriilimi peqataapput. Pikkorissareernerup kingorna ilaqutariinnut siunnersorti ukioq affaq tulleq sapaatip-akunneranut ataasiarluni angerlarsimaffiannut pulaartarpoq.

- Kinguneraa ullumikkut nuannaarneq, pilluarneq, immitsinnut oqaloqatigiissinnaalerneq. Pilluaqaagut maani, Marie Johansen Berthelsen oqarpoq.

Ilaqutariit Johansen Berthelsenikkut meerartaat ataatsimiit 17-inut ukioqarput.

Kalaallit Nunaanni Meeqqat pillugit misissuinerit sapaatip-akunnera kingulleq saqqummersut takutippaat, meeqqat 27 procentii sumiginnagaasartartut – patittarneqartarlutik -imigassamik atornerluisuni alliartortuullutik imaluunniit angajoqqaaminnit soqutigineqaratik. Meeqqat tallimararterutaasa atuarnerminni ajornartorsiutaat angerlarsimaffimmi atugarliuutinit aamma aallaaveqartarput.