Inuusuttunnguaq 14-inik ukiulik, ernini inoorlaaq ilagalugu napparsimmavissuarmi Rigshospitalimiit ullut 14-it missaasa matuma siorna qimaagaluartoq, Kalaallit Nunaannut maanna utersimalerpoq.
Niviarsiaqqap arni ilagaa, meeqqanili pinnagu. Sivisunerusumik Danmarkimiinnissani orniginartikkunnaarsimagaa, aviisi BT allappoq.
- Sapilivippunga. Immaqa allaanngilaq parnaarussivimmiilluni. Danmarkimiinnissatsinnut nukissaaruppugut, inuusuttunnguaq BT-mut oqarpoq.
Nukappiaraq Danmarkimi paaqqinnittarfimmiippoq, meeqqalli Kalaallit Nunaannukartinneqarnissaa 14-inik ukiullip arnaatalu ilungersorlutik sulissutiginiarpaat.
Tamannali ajornakusoorsinnaavoq, piffissarlu sivisoorujussuaq immaqa atorneqassaaq, Danmarkimimi inunnik isumaginnittut aalajangersimapput oqarlutik, nukappiaraq aanaamini peroriartussagaluarpat tamanna nukappiaqqamut peqqinnartuunavianngitsoq, aanaava tarnimigut napparsimasuuummat.
Tamannali aanaasup ilumuunnginnerarpaa.
- Ilumoorpoq ajornartorsiuteqarnikuugama, tarnikkulli nappaateqarneragaanera eqqunngilaq, oqarpoq.
Inunnik isumaginnittunit ikiorserneqarnissartik maanna neriuutigaat, nukappiarannguaq Kalaallit Nunaannukartinneqarsinnaaniassammat.