Anaanaasoq imigassartorsimavoq, ernera pingasunik ukiulik aqqusinermi kisimi angalaarpoq

Nukappiaqqap kisimi aqqusinermi angalaarnera innuttaasuniit ippigineqarsimavoq, taamaalillutik Nuummi politiit saaffigineqarput.

Imigassartorsimaneq pissutaalluni sumiginnarneqarsimasoq paasineqarpoq.
 
- Tallimanngormat ualigaa marluk missaani innuttaasuminngaanniit saaffigineqarpugut, nukappiaraq ukiukitsoq Indrutsivejimi naapissimallugu. Assut eqqumiigisimavaa kisimiinnera, taavalu ukiukittunnguummat ernumagisimallugu. Uagutsinnut saaffiginnissut taamatut tusarliunneqarpoq. ornipparput paasillugulu kisimiittoq, Politikommissær Poul Petersen oqarpoq.

Anaanaasoq erneralu inunnik isumaginnittoqarfimmit ilisarisimaneqareertut

Nukappiaraq taanna pingasunik ukiulik aatsaat inunnik isumaginnittoqarfimmiit sullinneqalinngilaq, siornatigut sullinneqartarsimasoq politikommissærip oqaatigaa.
 
- Politeeqarfimmi apersorparput kinaassusissarsiorlugu, aammalu arlaannik susoqarsimanersoq paasiniarlugu. Aallaqqaammut iluatsippallaanngilarput, taava inunnik isumaginnittoqarfik kalerripparput. oqaloqatigiinnitsinni paasinarsivoq kinaanersoq. Inunnik isumaginnittoqarfiup nalunngereersimavaa kinaasoq, siornatigut sullittareersimagamikku.
 
Nukappiaqqap pingasunik ukiullip arnami imigassartorsimanera pissutaalluni angerlarsimaffiup avataanut inissinneqarpoq.

Nukappiariaq nerisimanngitsoq nassaarineqarpoq

- Angerlarsimaffianut alakkaavugut. Tassanilu paasivarput anaanaasoq paarisinnaanavianngikkaa. Taamaattumik allamut inissineqarpoq.
 
- Taava isumaqarpa angajoqqaajusut imigassartorsimasut?
 
- Suu, Politikommissæri Poul Petersen oqarpoq.
 
Politiinit paasineqarpoq nukappiaraq ulloq taanna ualiusoq suli ullormut nerisaqarsimanngitsoq, kaattorlu
Politikommissærip Poul Petersenip aamma oqaatigaa meeqqanik sumiginnakkanik ukioq manna minnerpaanik quleriarlutik naammattuuisimallutik.