Kulturi

Anaana suua?

NAPA - Nunani Avannarlerni Piorsarsimassutsikkut Attaveqaat - Nunatsinnit tamarmit meeqqat titartagaannik katersuileruttorpoq. Meeqqat inuusuttullu titartagaat eqqumiitsuliatut piorsarsimassutsikkullu oqaluttuarisaanermut ilaalertussatut isiginiarneqassapput.

Allattoq Karsten Sommer

januaarip 13-at 2016 05:04

Nutserisoq Simon Uldum -

Inersimasut meeqqat isaannit isigalugit qanoq isikkoqarpat aamma titaganngortitsinerminni qanoq tamanna ersersinniartarpaat?

Suliniutigineqartoq taaguuteqarpoq Anaanaga.

Meeqqat inuusuttullu peqquneqarsimapput "anaanamik" isiginnittaasertik malillugu titartaaqqullugit.

Anaana suua? Anaana susinnaava? Aamma anaana peqatigalugu sunik sammisaqartoqarsinnaava?

- Meeqqat eqqumiitsuliaat tassaapput eqqumiitsuliat erlinnartuliatut isigisariallit, kisianni taama pineqanngitsut, qaqutigorsuaannarmi immaqa meeqqat suliaat uniffigalugit qimerluuataartarpavut. Nuummi Eqqumiitsulianik Katersugaasiviup saqqummersitsiviini kusanartuni”Anaanaga” aqqutigalugu meeqqat suliaat piviusulersaarutitut isigalutit takuneqarsinnaallutillu atuarneqarsinnaajumaarput, NAPA-mi pisortaq Mats Bjerde taama oqarpoq

Kikkulluunniit ukioqanngitsunit 18-inut ukiullit peqataasinnaapput. Anaana pillugu eqqumiitsuliaaqqat NAPA-mut, Nuummi Eqqumiitsulianik Katersugaasivimmut imaluunniit Nunatta Atuagaateqarfianut kingusinnerpaamik januaarip 18-iani nassiunneqarsinnaapput.

Titartakkat nassiunneqartut kingorna Nuummi Eqqumiitsulianik Katersugaasivimmi Unnuk Kulturisiorfimmi januaarip 23-ani saqqummersinneqarumaarput.

Saqqummersitaq kingorna nunatsinni angallanneqassaaq ilaatigut Ilulissani Eqqumiitsulianik katersugaasivimmi saqqummersinneqassalluni.