Amutsiviup ingerlaqqinnissaa pillugu Autocompagniet Qaqortoq ApS isumaqatigiissusiorfigineqaraluarpoq, suliffeqarfiup ingerlaqqinnissaa siunertaralugu. Suliffeqarfilli taanna ukiup ingerlanerani akiliisinnaajunnaarluni unimmat kommuni suliffeqarfimmik allamik suleqatiserinnippoq, maannali aamma angusaqarfiunngitsumik.
Teknikimut avatangiisinullu ataatsimiititaliami tallimanngormat apriilip ulluisa 25-anni tamanna ataatsimiissutigineqarpoq, isumaqatigiissuteqarnerullu taamaatiinnarnissaa aalajangiunneqarluni.
Amutsiviup ingerlaannarnissaa qulakkeerumallugu kommunip teknimut pisortaa inuutissarsiornermut suliffeqarnermullu pisortaq peqatigalugu suliffeqarfimmik nutaamik isumaqatigiinniarnissamik piginnaatinneqarput.
- Aalisartut arlaqartut angallatiminnik amutsivimmi iluarsaatitsisinnaannginnertik pillugu saaffiginnittarput. Tamanna kipiluttunarmat isumaqatigiissut atorunnaarseriarlugu allamik isumaqatigiissusiornissarput siunniupparput, Qaqortup borgmesteria Simon Simonsen, Siumumeersoq, Radioaviisimut oqarpoq.
Amutsiviup sapaatip-akunnerani matumani nutaamik isumaqatigiissuteqarfiginissaa naatsorsuutigigitsik aamma oqarpoq.