Amnesty Nunatsinni aallartisaqqinnialerpoq
- Amnestyp Kalaallit Nunaanni pingaaruteqartumik sulinera saaffiginnittunit oqariartuutigineqartarpoq, Roland Thomsen oqarpoq.
Sooq suliniaqatigiiffik nunatsinni pingaaruteqarnersoq pillugu ima oqarpoq:
- Pingaaruteqarpoq Kalaallit Nunaanni immikkoortortaqarnissaa, taamaasilluta isaasalerlugu oqarsinnaavugut ilumut inuit pisinnaatitaaffii aamma Kalaallit Nunaanni malinneqartut, Roland Thomsen oqarpoq.
Nunatsinni immikkoortortaqarfiup aallartisarnissaanut piareersaleruttortoq Tasiilamiippoq, ateqarlunilu Laila O. Kristiansen. Immikkoortortaqarfiup aallartisarnissaa ima nassuiaatigaa:
- Tassa malugisakka malillugit meeqqat pisinnaatitaaffiinik ilisimasaqanngitsut arlaqarmata. Paasisitsiniaaneq annertunerusuuppat siunissami meeqqat periarfissagissaarnerussagaluarput, Laila O. Kristiansen oqarpoq.
- Paasisitsiniaaneq periarpat suna tamarmi aaqqissasoq ilimaginngilara, kisianni neriuutigaara arlaqartut pisinnaatitaaffitik nalunngileriarunikkit siumut aallarumaartut. Immaqa ingerlaannaanngikkaluartoq kisianni inuunerup ilaani taakku paasisatik iluaqutigisinnaassavaat, Laila O. Kristiansen taama oqarpoq.
Amnesty International nunarsuaq tamakkerlugu 3,5 milliuuninik ilaasortaqarpoq, taakkunannga Danmarkimi inuit 100.000-it ilaasortaapput. Nunatsinnilu ilaasortat Roland Thomsen oqarneratuut 125-iullutik.