Amnesty International: Isertitsivinni pissutsit inuppalaanngilluinnarput

Ole Hoff-Lund oqarpoq, isertitsivinni pissuserineqartartut ilaatigut naalliutsitsinertulluunniit taaneqartariaqangajapput, isornarluinnarlutillu. Tupinnaqaaq ullutsinni Kalaallit Nunaanni taamatut pisoqartarmat. Tigummineqarallartut qulliit qamissanagit, videoliarineqaannavillutik allamik pisataqanngitsuni taamaallaat nallavissaqartinneqarlutik, qaammatini arlalinni paarnaarusimaneqartarnerat, nunani allani peqqarniisaarniat pineqartarnerinut assigusut, Ole Hoff-Lund oqarpoq. Immaqa taamatut oqarneq ingasagineqarsinnaagaluarpoq, kisianni inuit paarnaarusimaneqartut innarlerneqarsinnaanerat soqutiginngitsutut ilioraanni sakkortuumik isornartorsioneqartariaqarpoq. Taamaammat Pinerluttunik isumaginnittoqarfiup, Politimestereqarfiup Inatsiseqarnerlu pillugit ministereqarfiup pissutsit iluarsarniarlugit isumaqatigiissuteqarsimanerat uanga pissusissamisoorsoraara. Taama sivisutigisumik inuttut taama naalliunartigisumik tigummigalaagaasarnerit unitsinniarlugit isumaqatigiissutaat uanga iluarinartilluinnarpara, Ole Hoff-Lund oqarpoq.

Qulliit qaminneqarneq ajortut, videoliarineqaannavilluni allamillu pisataqanngitsumi taamaallaat natermi madrasi, taamatut sivisuumik paarnaarusimaneqartup, kialuunniit taamatut atugassaqartitaaguni, tarnikkut innarliutiginngitsoornavianngimmagu, pissutsit taamaattut unitsinneqartariaqalerput, Amnesty Internationalip tusagaasiinermut pisortaa, Ole Hoff-Lund oqarpoq.

Unnugu Qanoruumi taamatut sivisuumik paarnaarusimaneqartarnerup qanoq tarnikkut ajoqusiisinnaanera sammineqassaaq.