Amnesty inatsisinik atortitsinermut ministerimut saaffiginnippoq

Amnesty Kalaallit Nunaata Nuup Eqqartuussivia inuit pisinnaatitaaffiinik meeqqallu pisinnaatitaaffii pillugit isumaqatigiissummik unioqqutitsisimasutut pasillerpaa.
Allattoq Elisa Isaksen
novembarip 08-at 2007 10:54

Tamanna pivoq niviarsiaqqat mikisut aataminnit kinguaassiuutitigut atornerlunneqarsimasut pillugit Sermitsiaq allaaserinnereersorlu. Aviisip paasissutissat Eqqartuussivimmit unnerluussummit pissarsiarisimavai. Tassalu tamatumunnga atatillugu Kalaallit Nunaanni Amnesty’p siulittaasua Roland Thomsen isumaqarpoq tamanna FN-ip isumaqatigiissutaanik unioqqutitsinerusoq.

- Paasitinneqarpugut unnerluussutip eqqartuussutillu assilinerata tunniunneqartarnerat periaasiusartoq, uagulli sapiillisaarluta tamanna periaaserineqarpat periaaserineqanngikkaluarpalluunniit Nuup Eqqartuussivia Inuit Pisinnaatitaaffii pillugit Isumaqatigiissummik 1948-meersumik kiisalu Meeqqat Pisinnaatitaaffii pillugit Isumaqatigiissummik unioqqutitseqataasimanerassavarput, tassa qanigisanut inuttullu namminermut paasissutissat kikkunnulluunniit tusarliunneqarmata taamalu niviarsiaqqat taakkua marluk nikanarsarneqannginnissaat, isigineqarnerat inuunerminnillu ingerlatitseqqinnissaat assorsuaq ajoquserneqarlutik, Roland Thomsen allappoq.

Meeqqat pillugit isumaqatigiissut naapertorlugu meeqqat inuttut namminneq inuunermik akuliuffigineqannginnissaannut kiisalu eqqunngitsumik nikanarsarneqarnissamut isigineqarnerullu ajortisarneqarnissaannut illersugaapput. Amnesty Kalaallit Nunaat maanna inatsisinik atortitsinermut ministerimut Lene Espersenimut suliassaq pillugu saaffiginnippoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq