Ammip qalipaataa tunngavigalugu saassussineq
Danmarkimi ammip qalipaataa aallaavigalugu ilaqutariit ippassaq ualikkut saassutarineqarput.
Københavnip avannaatungaani Holte Midtpunkt-imi biilit unittarfianni ilaqutariit inunnit arlalinnit "Dansk Front”-imik saatungimikkut allannilinnik tujuuluaraqartunit unguneqarput, ilaqutariillu nunami allamiuusut angutitaat 25-inik ukioqartoq saassutarineqarpoq, kiinnamigut isimmittarneqarluni anaattamillu anaalerniarneqarluni. Annerusumilli ajoqusinngitsoq politiit oqaatigaat.
Dansk Front nunaminnik ingasattajaarlutik pingaartitsiniartut peqatigiiffigaat, Danmarkip danskiniinnaq nunagineqarnissaanik sorsuutiginnittoq.
Politiit angutit pingasut arnarlu pisumut atatillugu tigusaraat. Ilaat angut 26-nik ukiulik sakkortuumik nakuusersimasutut unnerluutigineqarluni ulluni aqqaneq marlunni tigummigallagassanngortinneqarpoq.
- Saassutsittoq saassussisorlu imminnut ilisarisimanngillat. Taamaattumik saassussineq nunamik allamiumik saassussinertut isigalugu pineqaatissiinermik kinguneqartikkusussimavarput, politimester Arne Stevns DR Københavnimut oqarpoq.
Ammip qalipaataanik tunngavilimmik saassussisimasutut pisuutitaaneq ullumikkut sivisuumik parnaarussaanermik kinguneqartarpoq.
