Ammip qalipaata tunngavigalugu immikkortitaasarneq siulittaasup isornartorsiorpaa
- Ammip qalipaata pillugu assigiinngisitsineq tujorminartuuvoq kusanaallunilu. Tamannalu qanittukkut misigaara tassa namminiilivinnissaq pillugu oqallinnerup kingorna allakkama, tamanna 'nuannarineqarnissaannaq pillugu tusaaqqusaarinerusoq', Demokraatit Inuusuttaasa siulittaasuat, Rasmus Dalsgaard Andersen, Sermitsiaq.AG-mit apersorneqarnermi kingorna facebookikkut taama allappoq.
Sermitsiaq.AG-mit apersorneqarnermini politikerit nuimasut peqquai, namminiilivinnissaq pillugu pilersaarummik aningaasartaqartumik saqqummiusseqqullugit nuannarineqaannarnissaq pillugu oqalukkunnaarlutik.
- Kalaallit inuiaqatiigiit pitsaasumik atugassaqartinniarussigit, taava siunnersuummik pitsaanerulersitsisussamik saqqummiisariaqarpusi oqaatsit imaqanngitsut ullumi tusaasakka piunnaarlugit, tassami taakku atorlugit inuit isummertikkusuppasi ilissinnut isumaqataatilerlugit, Dalsgaard Andersen Sermitsiaq.AG-mut oqarpoq.
Taama aviisimut oqaluttuareersorlu Demokraatit Inuusuttaasa nittartagaannut inuppassuit allaaserisaqarput isummersorlutik. Ilaat ammip qalipaataa pillugu assigiinngisitsinermik sakkortuunik allaaserisaqarlutik.
- Inuit ilaat allapput uanga kalaallit inuiaqatigiinnut peqataanngitsunga oqarlutik kalaallisut oqalussinnaanagaluunniit isikkoqannginnama taamaattumillu politikkikkut oqallinnernut peqataasariaqanngitsunga, Demokraatit Inuusuttaasa siulittaasuat, facebookikkut allappoq.
Kikkut tamarmik inissaqartariaqarput
Rasmus Dalsgaard Andersen aamma isumaqarpoq, ammip qalipaataa qanoq ittuugaluarpalluunniit qanoq oqaaseqaraluaraanniluunniit angutaagaanni arnaagaanniluunniit, inuiaqatigiinni kalaallini oqalinnermut peqataanissaq inissaqartariaqartoq.
- Tusaraagakku kalaallit ilaat qaamasumik amillit kalaallisut ameqannginnertik pillugu imaluunniit kalaallisut oqalunneq ajornertik pillugu tujormisinneqartartut taava eqqarsalersarpunga, Nunatsinni annertuumik ajornartorsiuteqartugut, Demokraatit Inuusuttaasa siulittaasuat, Rasmus Dalsgaard Andersen naggasiivoq.