Amminik inerteqquteqalersitsiniat ilapput
Puisit amiisa nunani EU-mi ilaasortaasuni tuniniarneqartarnerisa suliarineqartarnerisalu inerteqqutigineqalernissaannik siunnersuuteqartut ilapput.
Siusinnerusukkut maani Radioavisimi tusagassiaraarput, Belgiamiut inatsisartuisa siunnersuutigigaat, puisit amiisa tuniniarneqartarnerisa suliarineqartarnerisalu inerteqqutaatilernissaat. Siunnersuut Belgiami qinersisoqareernerani aalajangiiffigineqassaaq. Holland-ip inatsisartuini ataatsimiititaliaq ippassaq ataatsimiinnermini puisit amiisa inerteqqutigineqalernissaat oqallisigaa – ministerilu tassunga oqartussaasoq inatsisissatut siunnersuumik siunnersuusiorniarluni neriorsuisimavoq. Siunnersuut tassunnga assingusoq Tuluit Nunaanni ullumi siunnersuutigineqarpoq – Tuluit siunnersuutaanni pusit amiisa EU-mi tamarmi inerteqqutigineqalernissaat siunnersuutigineqarpoq. Nunat ataasiakkaarlutik puisit amiisa tunisassiarineqarneranik inerteqquteqquteqalernissamik siunnersuuteqarnissaat – Namminersornerullutik Oqartussanit ernummatigineqarsimavoq. Piniarnermut naalakkersuisoqarfimmi pisortaq Amalie Jessen tamanna pillugu ima oqarpoq:
- Tassami tulleriiaalernerat taanna ernumanartoqarpoq, soorunami aamma piffissaajarnarnermik, piffissarujussuaq sulisullu annertuumik ulapittarnerat malunnarpoq, oqartoqarsinnaavoq ”arsat sisamat/ tallimat massakkut silaannarmiitinneqartut”.
Canadap aallartitaqarfia Hollandimi Haagimiittoq Norgep Danmarkillu aallartitaqarfiinut saaffiginnissimavoq, Hollandimiut inerteqquteqalernissamik oqallinnerisa akissuteqarfigineqarnissaannik suleqatiseralugit.
Canadamiut suleqatigineqarnerat mianernartuunnginnersoq Amalie Jessen-imut apequtigaarput, imalu oqarpoq:
- Soorunami mianerisariaqarparput, annertoorujussuarmik ”anaataq kaatarneqaramik”, kisianni taama piniariaasiat uumasut nakorsaannit allanillu ilisimasalinnit pitsaasutut nalilerneqarnikuupput, taannalu uagut akuleruffigissanngilarput, kisianni uagutsinnut tunngasut, uagutsinnut kingunerusinnaasut iluaqutaasinnaasullu, tamaasa eqqumaffigaavut,
Piniarnermut Pisortaqafimmi pisortaq, Amalie Jessen, oqarpoq. Puisit amii nunani naggueqatigiinni inuit piniartuinit pisarineqarsimasut inerteqqutigineqalernissaat pinngitsoortinniarneqarpoq. Namminersornerullutik Oqartussat arlaleriarujussuarlutik erseqqissartarpaat, puisit amiinik eqqussuinissamik inerteqquteqalerpat Kalaallit Nunaat eqqorneqartussaasoq, soorlu ’80-isikkunni misilittakkat tamanna takutikkaat.
Qanorooq unnugu aallakaatinneqarpat, Belgiap Danmarkimi aallartitaa, nunanullu allanut naalakkersuisoq, Josef Motzfeldt, pulaartorineqassapput, puisillu amii oqallisigineqassapput.
