Amminik atisaliat pillugit saqqummersitsinissaq piareersarneqaleruttorpoq
Saqqummersitsineq Pels - liv og død, oktobarip ulluisa sisamaanni ammarneqassaaq.
Ammit nunani avannarpasinnerusuneersut katersugaasiviup katersugaatai ukiuni kingullerni assiliortorneqarsimapput, 3d fotografering atorlugu assiliortorneqarsimallutik.
Saqqummersitsinermi tamanna immikkut maluginiagassaajumaarpoq, amminilli atisaliat nutaajunerusut aamma saqqummersinneqarumaarput.
- Uumasut amiisa atisaliarinissaat siunertaralugu uumasunik ullumikkut kinguaassiortitsisoqarlunilu piniartoqartarnera ileqqorissaarnerua imaluunnit imminut illersorneqarsinnaava? Apeqqutit tamakku saqqummersitsinermi ilaatigut akissutissarsiniarneqarput. Ammimmi atorneqarnerat ukiut ingerlanerini allanngoriartorsimavoq, amminillu atisalianik atuineq ullumikkut qanoq isigineqarpa? Katersugaasivissuaq aperivoq.
Amminik atuinermi inuit assigiinngitsut, illuatungeriillu, isumaat saqqummersinneqarniarput, uumasut atugarisaat oqallisigineqassallutik, soorlu aamma nunap inoqqaavisa pisinnaatitaaffii, inuulluarneq aningaasarsiornerlu oqallisigineqarumaartut.