Ammeriviup aningaasaqarnermi pisortarisimasaa qulaarinnippoq

Kalaallit Nunaata ammeriviani aningaasanik aqutsinermi pisortaasimasoq Jacob Abelsen, Hans Enoksenimut ammasumik allagaqarluni ammerivimmi pisortaq Michael Nielsen sakkortuumik uparuarpaa, puisit amiinik Canadamut tunisinermi naatsorsuutit ammeriviup siulersuisuinut takutinnaveersaarneqartarsimasutut oqaatigalugu.

- Taamannak allagaqarninnut aallaavigaara, uanga aningaasaqarnermut pisortaanerma nalaani qanoq pisoqartarsimanera nalunagu taavalu pisortaminngaanniit avammut oqaatigineqartartut eqqunngitsuuneri isiginngitsuusaarsinnaajunnaarakkit, Jacob Abelsen oqarpoq.

Taanna aperaarput, uppernarsaatissat pigisani sooq politiinut tunniussimannginnerai.

- Isumaqarpunga uanga politiinut tunniussinissannut tunngavissaqanngitsunga, eqqortuusorinngilara uanga politiinut tunniussinissara. Isumaqarpunga piginnittunut toqqaannarlugu oqaatigigukku eqqornerussasoq. Taava piginnittut namminneq suniarnerlutik suliniutigisariaqarpaat, Jacob Abelsen oqarpoq.

Aperaarput, siornatigut ammerivimmi atorfeqarsimagaluaruniluunniit suli nipangiussisussaanermik suli peqarmat sooq massakkut oqartariaqalersimanersoq.

- Taamatut oqarusulerninnut tunngaviuvoq, pisortaminngaanniit avammut oqaatigineqartartut amigartarneri taavalu aamma ilaatigut eqqunngitsut oqaatigineqartarneri tunngavigalugit taamatut qisuariarpunga. Aamma isumaqarama pingaaruteqartorujussuusoq ammerivik piniartut inuunerinut taamak tunngatigisoq, uagullu avammut kiinnernitsinnut pingaaruteqartigisoq tamatumalu innarlerneqarsinnaanera eqqarsaatigalugu isumaqarpunga kialluunniit nunatsinni najugaqartup qisuariarfiginissaanut pisussaaffeqartoq,

Taama oqarpoq, Kalaallit Nunaata ammeriviani aningaasanik aqutsinermi siornatigut pisortaasimasoq Jacob Abelsen.

Taassuma assersuuteqarluni oqaatigaa, ammeriviup pisortaata ammit canadameersut taamaallaat kangianut tunisaasarnerarsimagai, uffalu aamma Danmarkimut tunisaasaraluartut.