Ammasumik killisiuisimaneq Amnesty-p uparuarpaa

Nukappissap 15-inik ukiullip Aalborgimi toqutsisimasutut pasineqarluni killisiorneqarnera matoqqasumik ingerlanneqannginnera, Amnesty / Kalaallit Nunaat-a isornartorsiorpaa.

Ileqqut malillugit meeqqanik inuusuttunilluunniit ukiukitsunik killisiuinerit matoqqasumik ingerlanneqartaraluarput, taama aviisi Sermitsiaq nittartakkamini allaaserinnippoq.

Amnesty / Kalaallit Nunaat-neersup Roland Thomsenip aamma uparuarpaa, nukappissap kalaallimik illersuisulerneqarsimannginnera, aamma inersimasut parnaarussiviannut inissinneqarsimanera.

Amnesty / Kalaallit Nunaat Folketingip ombudsmandianut maanna apeqquteqarnialerpoq, paasiniarlugu 15-inik ukiullip parnaarunneqarnera killisiorneqarneralu eqqortumik ingerlanneqarsimanersoq.

Inuit Ataqatigiit Amnesty-p uparuaatai illersorlugit nalunaarpoq, inatsisartut inatsiseqarnermut ataatsimiititaliaanut aamma ilaqutariinnut ataatsimiititaliamut apeqqutinik saqqummiussinialerlutik.