Ammaanermi oqalugiaat: Ikippallaat ilinniagaqartarput
Inatsisartut ukiakkut ataatsimiinnerat ullumi anorersuartumi siallersumilu aallartippoq. Inatsisartut ataatsimiittarfiata silataani anori nipiliorpoq sialullu torarpalulluni.
Naalakkersuisut siulittaasuat, Múte B. Egede (IA) politikkikkut ukioq ammarlugu ataatsimiittarfiup oqaaseqartarfianit oqalugiarpoq. Politikkikkut ukioq silatulli tarrajulluni aappaagumut aningaasanut inatsisissatut siunnersuutip 71,4 millionit koruuninik amigartoortuteqarneranik aallartinneqarpoq.’
- Nuannarineqanngitsunik aalajangiisarumaarpugut - aammali nuannaajallannartunik aalajangiisarumaarluta, Múte B. Egede ammaalluni oqalugiarnermini oqarpoq.
Inuusuttut imminut toqunnermik pinaveersaartitseqataassasut
Meeqqat pisinnaatitaaffiinik illersuisup, MIO-p nunatsinni imminut toqunnerit amerlassusaannik ikilisaanissamut inuusuttut siunnersuutaat ataasinngormat saqummiuppai. Nalunaarusiaq Qamanimik ateqarpoq, tassanilu nunatsinni sumiiffinnit tamanit inuusuttut imminut toqunnermik pinaveersaartitsinissamut qimagaasullu qanoq ikiorneqarsinnaaneranut innersuussuteqarput.
- Imminut toqunnermik pinaveersaartitsinermik suliaqarnermi inuusuttut peqataatinneqarnissaat pingaaruteqarpoq, Múte B. Egede oqarpoq.
Siumup siulittaasua, Erik Jensen (saamerleq) IA-llu siulittaasua Múte B. Egede. Assi: Else Olsvig/KNR
Periusissiaq kingulleq 2019-imi atorunnaarpoq. Tamatuma kingorna imminut toqunnermik akiuiniarnermik suliaqarneq Inuuneritta III aqqutigalugu ingerlanneqarpoq. Inatsisartulli imminut toqunnermik pinaveersaartitsinissamut nutaamik periusissiorniarlutik 2020-mi ukiakkut aalajangerpaat.
Periusissaq taanna ukioq manna upernaakkut piareernissaa ilaqutariinnut peqqissutsimullu naalakkersuisup, Mimi Karlsenip (IA) naatsorsuutigigaluarpaa. Taannali meeqqat pisinnaatitaaffiinik suliaqartup MIO-p ilaatinneqarnissaa pissutigalugu aappaagu upernaakkumut kinguartinneqarpoq.
Nammineersinnaanermut ilinniarneq aqqutissaasoq
Ammaanermi oqalugiaammi peqqinnissaqarfiup unammillernarnera uteqqinneqarpoq.
- Ukiuni kingullerni marlunni peqqissaasunik nakorsanillu pissarsiniartarnerup ajornakusoornera napparsimaveqarfitsinni nalaapparput. Peqqinnissaqarfimmi sulisut piffissami sivitsortumi pisarnerminnit annerusumik ilungersortariaqartarsimapput, Naalakkersuisut siulittaasuat oqarpoq.
Ajornartorsiutaasup qanoq iliuuseqarfiginissaa Múte B. Egedep eqqaanngilaa.
Inatsisartut ataatsimiittarfimmukarneranni anorlerlunilu siallerpoq. Assi: Else Olsvig/KNR
Ajornartorsiutaasoq alla Múte B. Egedep erseqqissaatigisaa aamma nutaajunngilaq: Tassa innuttaasut affaanngitsulluunniit meeqqat atuarfiata kingorna ilinniagaqartarput.
- Amerlanerusut ilinniagaqassapput. Inuusuttut amerlavallaat suli ilinniagaqalinngitsoortarput taamaalillutillu suliffeqarnermut tamakkiisumik peqataalersaratik. Suliffeqarfinni tamani sulisussanik amigaateqarpugut, Múte B. Egede oqarpoq.
- Amerlanerusut ilinniagaqalerunik tamanna piitsuunermik ajornartorsiuteqarnermut annikillisaassaaq – minnerunngitsumillu nammineersinnaanermut tunngaviliissalluni.
Múte B. Egedelli inuusuttut qanoq amerlatigisut ilinniartikkusunnerlugit aalajangersimasut oqaatiginngilaa.
- Ukiut 20-30 qaangiuppata nunarput qanoq inissisimassava? Ullormiit ullormut allannguisoqarnissaa naatsorsuutigineqarsinnaanngilaq. Unammilligassanimmi ulikkaarpugut akerlianillu aamma nuannersorpassuaqarpoq. Ataatsimoorluta kivitseqataasa. Ataatsimoorluta suleqatigiitta. Suleqatigiikkaangattami akiugassaajunnaarluta angusaqarsinnaalersarpugut.
Oqalugiaataa tamaat uani atuarsinnaavat.
Vivan Motzfeldtip parteeqatini Erik Jensen eqippaa. Assi: Else Olsvig/KNR
Politikkikkut ukiup nutaap ullormi aallartinnerani anorlerlunilu siallerpoq. Assi: Mads Malik Fuglsang Holm/KNR
