Ammaalluni oqalugiaat Inatsisartuni oqallisigineqassaaq

Naalakkersuisut siulittaasuata, Kuupik Kleistip, tallimanngormat oqalugiarami ilaatigut Nunatta Karsiata imai killeqartut tikippai, siornaannarmi amigartoorutit 300 millioni koruuniummata. Aamma Naalakkersuisoqatigiit Royal Greenlandimut 500 millioni koruuninik aningaasaliisariaqarnikuupput. Taamaammat sutigut tamatigut sipaarnissaq Naalakkersuisut siulittaasuata kaammattuutigaa.

Aamma meeqqat inuusuttullu oqalugiarnermini eqqaavai, tassanilu oqaatigaa, suleqatigiissitat arlallit Naalakkersuisut iliuusissaannut inassuteqassallutik suliaqartut.

Kuupik Kleistip aamma suliffeqarfiit pisortanit pigineqartut ilaat namminersortunngortikkusuppai.

- Iluaqutissat sumiinnersut takujuminaalligaangata apeqqusertariaqarpoq, ilumut piginnittuuginnassanersugut, akileraartartullu akiliutaat taama amerlatigisut amigartoorutaasartunut akiliutigissanerigut, Kuupik Kleist oqarpoq.

Illuatungiliuttut ammaanermi oqalugiaammut pikkusuppallaanngillat. Siumup siulittaasuata, Aleqa Hammondip assersuutigalugu Nunatta nunanut allanut pisortatigoortumik politikkeqarnissaa maqaasivaa, Atassutip siulittaasua, Gerhardt Petersen, ajornartorsiuterpassuarnut aaqqiissutissanik ujartuisoq.