Amikup siulittuutai nalaatsornerinnakkut eqquuttarput
Danmarks Akvariumimi biologi amikunillu ilisimasalik, Anders Kofoed aamma oqarpoq, amikup Poulip pissusilersuutai nassuiarsinnaallugit.
- Amikup siunissamut takorluuisinnaanera upperinngivippara. Pisussanik eqqueriarnerani eqqugaasa amerlassutaat taamaallaat allaassutaapput, assigiinnarpaa tannermoornermi nalaatsornerinnaakkut eqquineq, Anders Kofoed oqarpoq.
Erfalasut qalipaataannik kusagisaqarnera pissutaatinneqartoq, Anders Kofoedip aamma upperinngilaa, tassami taanna amikoq, latinerisut taaneqartartoq Octopus vulgaris, qalipaatinik immikkoortitsisinnaanngilaq.
Amikup siunissamut takorluuisinnaanera ilumuunngitsoq uppernarsiniarlugu, Danmarks Akvariumimi guldfiskinnguaq misiliutigineqarpoq, taanna aalisagannguaq aalisakkanit tamanit sianiinnerpaatut isigineqartarpoq.
Anders Kofoed oqaluttuarpoq, aalisagannguup, Gilbertip, Hollandimiut Uruguaymiunut ajugaanissaat eqqoriareeraa, Spanialu Tysklandimut sapaatiuppat unamminermi ajugaasussaasoq, Gilbertip eqqoriarsimavaa.
Nunarsuatsinni arsaalluni pissartanngorniunnermi Gilbert Paulilu eqqoriaasartuni kisiartaanngillat. Hollandimi amikoq arnaviaq Pouline eqqoriaatinneqartarpoq, Indonisiamilu timmiaq Mani eqqoriaatinneqartarluni.
