Amigartoorutit: Savaaqqat 10.000-inik amerlanerit toqorarneqarpata aningaasaqarnikkut oqimaaqatigiittoqalissaaq
Amigartooruteqarfik Neqi A/S amigartooruteqaannassaaq.
Ukiumut nalunaarusiami kingullermi kisitsisitigut erserpoq amigartooruteqaqqittoq. Toqoraavik KNI-p ataaniittoq koruuninik 2,5 milliuuninik amigaartooruteqarpoq.
Kisitsit nikallunganaraluartut annikitsumik isumalluarneq malunnarpoq.
2021-mi Neqi A/S annertoqisunik amigartooruteqarpoq 26,9 milliuninik, naatsorsuutini 2014-imiit 2019-imut annertuumik kukkuluttornerup kingunerisaanik.
- Amigartoorneq naammaginngilarput, kisianni kaaviiaartitavut siuariaateqarmata naammagisimaarinnippugut.
Ole Vestergaard, Neqi A/S-imi pisortaq taama oqarpoq.
Ilumoorporlu. Neqi A/S-ip kaaviiaartitani annertusisippai, tassa akileraarutit aamma akiligassat akilertinnagit, ukiumut siulianut naleqqiullugu koruuninik 5 milliuuninik.
Ukiut tamaasa Neqi A/S akileraarutinit koruuninik 13 milliuuninik pisarpoq Namminersorlutik Oqartussat sullissinissamik isumaqatigiissuteqarfiginerisut. Neqi A/S-imi pisortaq naapertorlugu amigartoorutit sinneqartooruteqarnermut saatinneqassappata piumasaqataavoq savaaqqat ukiumut 10.000-inik amerlanerit tunineqartassasut.
- Tapiissuteqarnata aningaasaqassagutta savaaqqat amerlaneroqisut pisariaqassavavut, Ole Vestergaard oqarpoq nalunaarlunilu massakkut ukiumut savaaqqat 20.000 toqunneqartartut.
Aamma taasariaqarpoq ingerlatseqatigiiffiup tunngaviusup KNI-p Neqi A/S akiligassaanik koruuninik 142.5 milliuuninik isumakkeerfigimmagu.
Toqoraaviup aningaasaatai taamaalillutik nukittorsarneqarput, ullumikkut taakku koruunit 7 milliuuniupput
