Amerlasuut qallunaatoorusunnerupput

Kalaallit Nunaanni innutaasut amerlanersaat nutaarsiassanik qallunaatut allassimasunik atuarusunnerusarput. Kalaallit Nunaani tusagassiuutini kalaallit oqaasiisa atorneqarnerisa ajornartorsiutaanerat, maanna kisitsisinngorlugit uppernarsineqarput.

Nunatsinni innutaasut 48 procentiisa, aviisit nunatsinni saqqummersinneqartartut aamma nutaarsiassat nittartakkatsigut saqqummiunneqartut qallunaatut allassimasut atuartarpaat, 39 procentiisa kalaallisut allassimasut atuartarlugit, tusagassiuutit pillugit suleqatigiit nunatsinni innuttaasut tusagassiuutinik atuinerat pillugu nalunaarusiaani taamanna atuarneqarsinnaavoq.

Kikkut qallunaatut atuarnerusarnersut aamma kikkut kalaallisut atuarnerusartut assigiinngissuteqarput.

Nutaarsiassanik qallunaatut atuarnerusartut tassaapput, illoqarfinni najugaqartut aamma atorfillit.

Nutaarsiassanik kalaallisut atuarnerusartut tassaallutik nunaqarfinni imaluunniit avinngarusimanerusuni najugaqartut aamma innuttaasut 60it sinnerlugit ukioqartut.

KNRip nittartagaani allaaserisat qallunaatut allassimasut atuarneqarnerusarput.
Nittartakkami atuartartut 32 procentiisa qallunaatut allassimasut atuartarpaat, 12 procentit kalaallisut allaaserisat atuartarlugit.

Tusagassiuutinik atuartartut, qallunaatut allaaserisanik atuarnerusarnerat sunik patsiseqarnersoq kalaallit nunaanni tusagassiuutinik atuisarneq pillugu misissuinermi qulaajarneqanngilaq.

Kalaallit Nunaanni tusagassiorfinni kalaallit oqaasiinik atuinerup sallersaatinneqannginnera
tusagassiuutit pillugit suleqatigiissitap nassuiaataani qulakkeerlugu oqaatigineqarpoq, allaaserisat amerlanerpaartaat danskisut allanneqartarmata, allaaserisallu nutserisunit kalaallisuunngortinneqartarlutik.

Oqaatsit atorneqarnerannut ajornartorsiuteqarneq tusagassiuutit pillugit suleqatigiissitap  iliuuseqarfigineqarnissaa annertuutut isigineqarpoq, tamannalu kultureqarnermut naalakkersuisup Mimi Karlsenip pingaartillugu oqaatigaa.

Tusagassiuutini oqaatsit marluk atorneqarnerunissaat pingaartillugu  Mimi Karlsen isumaqarpoq, maannakkulli taamaanngitsoq oqaatigalugu.

- Oqaatsit tugassiorfinni ineriartortinneqartariaqarput. Kalaallit Nunaanni tusagassiorfinni amerlanerni allaaserineqartut amerlanersaat qallunaatuumit kalaallisuumut nutserneqartarnerat tupigusuutigaara, Mimi Karlsen oqarpoq.

- Tamana kalaallisut atuartartunut kalaallisuinnarlugu paasisartunut annertunerusumik ineriartorfiunngitsoq oqaatigissavara, isumaqarpunga kalaallisut qallunaatullu assigiimmik inertorfiusariaqartoq, Mimi Karlsen oqarpoq.

Tusagassiuutit pillugit suleqatigiissitap nalunaarusiamini innersuussutigaa, oqalutsit ilinniartinneqartarneranni, tusagassiortut allaaserisaannik nutserisarnermik ilinniartitsisarneq aallartinneqartariaqarpoq, aamma tusagassiortut nutserisisullu kalaallit oqaasii pillugit ilinniartitseqqittarnissaat kissaatigineqarluni.

Nalunaarusiaq uani tamakkerlugu atuarsinnaavat: www.knr.gl/tusagassiuutit.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat