Amerlaqisut allagartartaartut
Ilinniagartuut sisamat, bachelorinngortut, immikkoortoqarfinnit arfinilinneersut, 17-it, isumaginninnermut siunnersortit qulit tusagassiortunngortullu ataatsip, ilinniarnerminni ingerlalluarsimaqisumi soraarummeernermut allagartaat tunniunneqassapput.
Ph.d.-mut ilinniartut marluk ilinniagartuunngortunik taaguuteqalernerannut atatillugu uppernarsaataat ilutigalugu aamma tunniunneqassapput.
Ukiumoortumik nalliuttorsiorneq iluatsillugu marlunnik ataqqinaammik doktorinngortitsisoqassaaq, nipilersornermik ilisimasalik, Michael Hauser, kalaallit inngerutaannik ilisimatusarsimasoq, aamma palasi cand,theol, Henrik Wilhjelm, doktorinngortinneqassallutik. Henrik Wilhjelm Kangaatsiami palasiusimanermi saniatigut ukiuni arlalinni aamma Ilisimatusarfimmi sulisimavoq.
Ullumikkut ulloq Ilisimatusarfimmi nalliuttorsiorfiuvoq, ukiumoortumillu ulloqeqqata siorna nalliuttorsiortoqareerpat nalliuttorsiorneq nereqatigiinnermik unnugu naggaserneqassaaq.