Amerlanerusut tikisittassagaluarpaat
Kalaallit Nunaanni takornarniaqarnermi ingerlatsisut, kiisalu Nunatsinni Takornarniaqarnermi Inuussutissarsiornermilu Siunnersuisoqatigiit, GTE, amerikamiunik tusagassiortunik amerlanerujussuarnik tikisitsisariaqaraluarput, taamaalilluni tusagassiutitigut Kalaallit Nunaata oqaluttuassartaa paasineqalissagaluarmat.
Aatsaat taamaaliornikkut takornarniat amerlasuut tikisinneqarnissaat pitsaanerpaamik angusaqarfiusinnaavoq, aqqullu nutaaq, Kangerlussuarmiit Baltimoremut aqqut, iluatsilluassagaluarpoq.
Taama inerniliivoq Københavnimi Handelshøjskolemi cand.merc.-itut naammasserlaaq, Stine Dudda.
Taassuma immikkut sammisani, qulequtsersimasani ”Grønlands image i USA”, tassa kalaallisuunngorlugu: ”Kalaallit Nunaata USA-miit isigineqarnera”-nik nutserneqarsinnaasoq, illersorlugu misilitsissutigeqqammerpaa. Aatsaallu siullerpaamik amerikamiut nunarput pillugu ilisimasaannik nunatsinnullu takornarniartinnissaannik imalimmik misissuisoqarpoq.
Taanna isumaqarpoq pappiaqqanik qillarissunik kusanasaakkanillu atuilluni nunarput pillugu aviisiliorluni nittarsaassiniartoqartarnera pilerisaarutitsialaanngitsoq. Amerikamiummigooq aviisilioriaatsit taama ittut unneqqarissumik tusagassiinertut isigineq ajormatigik.
Stine Dudda isumaqarpoq, imminut akilersinnaanerusumik takornarnianik tikisitsisarusukkaanni tusagassiorfippassuarnut siammasinnerusumik nittarsaassisoqartariaqartoq, taamaalilluni inuit paasilissagaluarmassuk, Kalaallit Nunaat inuiaqatigiinnit najorneqartoq tassaannaanngitsoq qeqertaq sikuinnangajak apummik ulikkaartoq, sermersuarlu aakkaluarpat Amerikap sineriaanut qarsutsinermik pilersitsisussaq.
Ilaatigut aamma amerikamiut soqutiginnilersikkumagaanni oqaluttuarisaaneq oqaluttuarineqarsinnaasoq Stine Duddap oqaatigaa: USA-mi amerlasuut isumaqarput Columbus qaamasunik amilinni siullersaalluni nunamik nassaartoq, qinngasaarilaartoqarsinnaavoq oqaluttuaralugulu nunatsinnut tikittoq siullerpaaq vikingiusoq, Stine Dudda oqarpoq.
