Amerlanerusut atuartalerput

Ullumi ulloq nunarsuaq tamakkerlugu Naalagaaffiit Peqatigiit inuit pisinnaatitaaffiinut ullorititaraat. Sermitsiap nittartagaani oqaluttuarineqarpoq ullumikkut ulloritinneqartumut atatillugu, nunarsuarmi sumiiffinni assigiinngitsuni meeqqat pisinnaatitaaffii pillugit saqqummiussisoqarpoq kingornatigullu qiortaasoqarlunilu nereqatigiittoqarpoq.

Naalagaaffiit Peqatigiit meeqqanut aningaasaateqarfia, Unicef, aamma ullumikkut nuannersumik nalunaaruteqarpoq, inuit tunngaviusumik pisinnaatitaaffeqarnerannut tunngalluinnartumik, tassa atuartuusinnaanermut tunngassumik.

Ukiut sisamaannaat matuma siornagumut naleqqiullugu meeqqat amerlanerusut atuartalersut, Unicef-ip nalunaarutaani allassimavoq.

2002-mi meeqqat 115 miliuuninik amerlassuseqartut atuarneq ajorput. 2006-imi kisitsisit taakkua 93 miliuuninut ikileriarput.

- Tamanna ukiut ikittunnguit ingerlaneranni pitsaasup tungaanut ineriartorneruvoq. Taamaattorli suli meeqqat amerlavallaat atuartinneqartanngitsut, Unicef Danmarkip pisortaa Steen M. Andersen oqarpoq.

Naalagaaffiit Peqatigiit anguniagaasa anguneqarsimanerat pillugu nalunaarusiaq naliliineruvoq – tassami naalagaaffiit Peqatigiit 2000-imi anguniagassatut isumaqatigiissutigaat 2015 nallertinnagu malunnaatilimmik iliuuseqartoqassasoq.

Anguniagassallu taakkua ilagaat meeqqat atuartuunissamut periarfissinneqassasut.

Tupaallaatissaanngitsumik Afrikami inoqajuitsup Saharap Kujataani meeqqanut atuarfeqarniarneq ajornartorsiutaanerpaavoq.

Tamaanimi meeqqat 41 miliuunit atuartuusussaagaluarlutik atuariartunngisaannarput, Aasiap Kujataani atuarfissaaleqineq taamatungajak iinnarpooq, tamaanimi meeqqat 31 miliuunit atuariartunngisaannarmata.