Amerikamiup pisortaq savimmik kapigaa taarsiivigitillunilu

Amerikamiu 27-nik ukiulik nulianilu imminnut illersorniarlutik norgimi suliffeqarfimmi pisortaasimasumik toqutsingajassimasoq, norgemiut koruuniinik millionip affangajaanik taarsiivigineqarimavoq.

Oslomi illorujussuup silataani aggustimi 2014-imi politiit amerikamiut nuliariit nunami nalasut nassaaraat.

Marluullutik aassuarmik ulikkaarlutik nunami eqillutik nalasut. Taakku sanianniippoq angut suliffeqarfimmi pisortaasimasoq savimmik kapineqarsimalluni toqulersoq.

Angut amerikamiu pisortamik arfineq pingasoriarluni kapisilluni toqutseriarsimasutut tigusarineqarpoq.

27-nik ukiulik qaammatini arfineq pingasungajanni parnaarussaasimavoq, kingornali misissuinerit paasinarsisippaat imminut illersorniarluni savilersorsimasoq.

Norgemi aviisi VG naapertorlugu civilstyrelsep amerikamiu eqqunngitsumik pineqaatissinneqarsimaneranut 492.000 koruuninik taarsiiffigineqartussanngortissimavaa.

- Suliaq naammassimmat assut oqiliallappoq. Angummut ilaqutaanullu suliaq assut artorsartitsisimasoq, illersuisua Øyvind Bratlien oqarpoq.

Pisortaasimasoq amerikamiup nulianik persuttaasimasutut qanittukkut qaammatini arfineq marlunni parnaarussassanngortinneqarpoq.

- Pineqaatissinneqartoq pisumut nammineq akisussaasariaqarpoq, landsrette eqqartuussut pillugu naliliivoq.

Taanna aamma amerikamiup nulianut 60.000 koruuninik taarsiisussanngortinneqarpoq.

Aviisi VG naapertorlugu suliaq pisortap suliareqqitassanngortissimavaa.