Amerikamiut tikeraarnerat isumalluarfiuvoq
Amerikami præsidentinngortussatut ilimagineqartoq, Senator John McCain, Ilulissanut ullaap tungaani tikiinnaqaaq, tikeraartitsisuilu nunatsinni Danmarkimilu naalakkersuisut isumalluarput, tikeraartitsinerup kingunerisaanik Amerika avatangiisinut politikkikkut piumassuseqarnerulerumaartoq:
-Tassa senatorit taamatut massakkut sunniuteqarluartoq nunatsinnut tikeraarumallutik kissaateqarnerat naalakkersuisunit tikilluaqquarput, neriuutigalugu amerikamiut avatangiisimut peqqarniisaarnermullugooq sorsunnermut peqataanerulernissaat tassuunakkut aqqutissiuunneqarumaartoq.
-Aamma namminneq isiminnik, siutiminnik qinngaminnillu misigalugulu, takullugulu tusaallugulu maluginiassammassuk silaannaap allanngoriartornerata inuuniarnitsinnut inuussutissarsiutitsinnut avatangiisinut, pinngortitamut, sunniutai qanoq peqqarniitsigisut. Minnerunngitsumik issittumi avatangiisit mianernartuupput sunnertiasuullutillu. Taamaammat taamatut tikeraartut senatorit sisamaannaagaluartut neriuutigaarput USA-mi oqallinnermi senatimi oqallinnermi sunniuteqarluartuummata pitsaasumik pinngortitap allanngoriartornerani sorsunnitsinni ikiuunnerunissaat amerikami aqqutissiuutissagaat,
taama oqarpoq nunanut allanut naalakkersuisoq Josef Motzfeldt, tikeraartitsinerup avatangiisinut illersuinerulernissamik kinguneqartitsissaanik isumalluartoq.
Danskit Avatangiisinut ministeriat Connie Hedegaard Josef Motzfeldtitulli isumalluarpoq:
-Tamatta nalunngilarput Senator John McCain apeqqutinut avatangiisinut tunngatillugu pingaartitsilluinnartuusoq, aammami siorna avatangiisinut ministerit 25-it maanga tikeraartorigatsigit nalunngilarput tamanna qanoq sunniuteqarluartigisimatiginersoq, taamaammat amerikamiut politikerit taama nuimatigisut maanga tikeraartinneqarnerat amerikamiut avatangiisinut pingaartitsinerulernissaannik kinguneqarluassasoq naatsorsuutigilluinnarpara. Danskit avatangiisinut ministeriat Connie Hedegaard radioavisimut oqarpoq,
Avatangiisinut illersuiniarluni suliniarnermi Connie Hedegaard oqariartuuteqarmat USA alloriarnermut tullinnguuttumut pingaaruteqarluinnartuusoq. Taanna aperaarput tikeraartitsineq manna qanoq sunniuteqarumaarsorineraa:
-Alloriarnerit manna ilagaat, aammalu amerikami partii pissaaneqartoq, Republikanerit pingaartitaat suunersoq aallaavigalugu avatangiisinut soqutiginninnerulernissaannut sunniisinnaanissaq pingaaruteqarpoq.
Taamaammat tikeraartugut Ilulissat kangianukaatissavavut nammineerlutik isiminnik takusinnaaniassammassuk mingutsitsinerup kingunerisaanik avatangiisit qanoq sunnerneqarnersut. Tikeraartitsinerpullu pisortatigoortorsuunani oqalugiarnerpassuaqaranilu pivoq, taamaalillunilu sunniuteqarnerungaarnissaanut isumalluassalluta pissutissaqarpugut, Connie Hedegaard oqarpoq.
Tikeraat tikiinnarlutik qulimiguulimmik Ilulissat kangianut takornariartinneqarput ualerlu manna umiatsiamik Sermermiut avataanut takornariartinneqarlutik.
