Amerikamiut sakkutuui tallimat Irakimi toqutaapput

Irakimi aqquserngit sinaanni qaartartumeerisoqarmat sakkutuut amerikamiut tallimat ippassaq toqutaapput, sisamallu ikiligaallutik, taama allappoq nutaarsiassaqartitsivik CNN.

Saassussineq sakkortunerpaaq provinsimi Divalami pivoq, amerikamiut sakkutuui eqimattakkaat qanittuanni qaartartoq qaarmat, tassanilu tassa sisamat toqutaapput marlullu ikiligaallutik, amerikamiut sakkutuuinit tusarfiit taama ilisimatitsipput. Bagdadittaaq avannamut-kippasissuani qaartartumeerisoqarmat ataaseq toqutaavoq, marluk ikiligaallutik, biilit arlalikkaat aqqutissaat ajunnginnersut sakkutuut misissuleruttoraat qaartartoq qaarmat.

Toqutaasut kingulliit tallimat ilangullugit amerikamiut sakkutuui Irakimiittut 3.233-t maannamut toqutaareersimalerput. Aamma amerikamiut sakkutuujunngitsut arfineq-marluk sulinerminni toqutaapput.

Nutaarsiassaqartitsiviit ullaaq-manna aamma ilisimatitsissutigaat, tuluk sakkutooq Basrami qaartartumeerisoqarmat aamma ikiligaasimasoq.