Amerikamiut sakkutuui Haitimut ikiuiartorput

Ajunaarnersuarmik eqqugaasut maanna suli utaqqisut ikiorsiissutit Haitimut tikiussuunneqalerput.

Amerikamiut sakkutuui Haitimukartinneqartussat 3.500-sut ilaat 100-it Haitimut, nunap sajunneranik richterip uuttuutaani 7-mik sakkortussusilimmik eqqugaasumut, tikereerput. Inuit 100.000-iussagatinneqartut ajunaarput.

USA-p præsidentia Barack Obama oqarpoq:

- Ikiuisussat Haitimukartitavut ullaaq tikipput sulinertillu aallartereerlugu, Obama oqarpoq.

Haitip innuttaasa ikiuisoqarnissaa pisariaqarteqaat. Inuit millionilikkuutaat toqungasut timaasa illullu aserorluinnarsimasut akornanni ullup aappassaa ikiortissamik utaqqillutik aqqusiniinnarmiipput. Ilaquttatik ikinngutitillu illut aseqquinit matoorussaasimasut utaqqinerminni assaannaminnik assaallutik annaanniarsaraat.

- Haitili puiguinnarneqanngilaq, Obama erseqqissaavoq. Oqaluttuarisaanermi nutaanerusumi ikiorsiinerit annersaat maanna aallartipparput. Ikiuisussat amerikamiuusut arlallit aallareerput aammalu nerisassat imerlu nassiunneqareerlutik. Aamma nakorsat arlalissuit Haitimukartinneqarput. Nakorsatut sulisinnaasut 300-it eqqugaasunik ikiuiartortinneqalerput, pisariaqartinneqassappallu suli 12.000-it aallartinneqarnissaminnut piareersimasut, Obama oqarpoq.

USA sakkutuunik imarsiortunik 2.000-inik Haitimukartitsereerpoq, tamaanilu pissutsit paatsiveerusimaarfiupput. Illorpassuit aserorsimapput sumiiffinnilu amerlaqisuni innaallagiaqanngilaq.

- Haitimi suut tamarmik aseruatitersimapput, FN-ip inuussutissaqarneq pillugu suliniaqatigiiffiata Haitimi pisortarisaa oqarpoq.

Aqqusernit immikkoortuini illorpassuit suujunnaarluinnarlutik aserorsimapput inuillu iluiniittut matoorussaasimallutik.

- Haiti annertuumik ikiorneqartariaqartoq nunarsuarmiut paasisariaqarpaat, FN-ip inuussutissaqarneq pillugu suliniaqatigiiffiata Haitimi pisortarisaa oqarpoq.