Amerikamiut parnaarussanik naalliutitsisarneragaaqqipput

Afghanistanip illoqarfiisa pingaarnersaanni Kabulimi sakkutooqarfiup Bagramimip parnaarussiviani parnaarussat naalliutsinneqartarsimallutik oqaatigaat. Tuluit tv-qarfissuata BBC-p inunnik ataasiakkaanik apersuineranni tamanna paasinarsivoq.
juunip 24-at 2009 11:30

2002-p 2008-allu akornanni parnaarussaaqqasimasut 27-t apersorneqarput. Taakku peqqarniisaarnianik al-Qaedakkunnik Talibaninillu tapersersuiniartutut nalilerneqarput, pisortatigoortumilli unnerluutigineqarsimanatik. Danmarkip Radioata nittartagaani tamanna atuarneqarsinnaavoq.

Parnaarussaaqqasimasut naalliutsinneqartarsimanertik oqaluttuaraat. Kiattorujussuarmiitsinneqarlutillu issittorujussuarmiitsinneqartarsimanertik oqaluttuaraat, soorlu aamma illuinnarsuutit atorlugit toqunneqarnissamik sioorasaarneqartarsimanertik oqaluttuarigaat.

- Ukiuutillugu imermik nillertumik kuerarneqartarpugut, kiattorujussuuneratalu nalaani imermik kissartumik kuerarneqartarluta, allaat qimmilisarfigineqartarluta, parnaarussaaqqasimasoq oqarpoq. Illuinnarsuummik aallaammilluunniit toqunneqarnissamik aamma sioorasaarneqartarpugut, parnaarussaasimasup oqaatigaa.

Pasilliutit USA-p illersornissamut ministereqarfianit akerlilerneqarput, parnaarussat inuppalaartumik pissusilersorfigineqarsimanerat oqaatigineqarluni.

Amerikamiut sakkutuuisa parnaarussanik naalliutitsisarsimanerat siornatigut saqqummiunneqarnikuuvoq, Irakimi Abu Ghraibip parnaarussiavianiittut Cubamilu Guantanamomi parnaarussat naalliutsinneqartarsimaneragaammata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq