Amerikamiut aviisii marluk nunatsinnik sammisaqarput

Kulturikkut illorsuaq Katuaq, Café Toqqorfik, Nuummi Katersugaasivik, pisiniarfik Qiviut neriniartarfillu Sarfalik. The New York Timesip Nuummi ornitassatut piukkussai taakkuupput.

Tamannalu Nuummi Nuutoqqami Katersugaasiviup pisortaata, Vinni Sølvbladip nuannaarutigaa.

- Café Toqqorfimmit ikinngutiga nuannaangaarluni iserpoq: ”Vinni The New York Timesimi allaaserineqarpoq”. Ikinngutiga ilanngutassiami ornitassatut piukkussatut allaatigisani aamma ilaavoq. Taamaammat marluulluta qiimmattappugut.

Naak The New York Times atlantikup illuatungaaniikkaluartoq Nuup nunattalu ataatsimut ilanngutassiami sammineqarnerat Vinni Sølvbladip pingaaruteqalissanerarpaa.

- Soorlu ujarak imaanut igikkaanni malii siaruartilersarput. Imaassinnaavoq inuit alapernaalersut: Sunaana Kalaallit Nunaanniittoq. Inuit puisinniartartuinnaanngillat. Nuuk illoqarfiuvoq uummaarissoq.

The Washington Postili illoqarfissuarmi Nuummi inuuneq qimallugu Arctic Circle Trailimi pisuttuaqataavoq.

Angalalluni allaatiginnittartup UNESCO-p eriagisassanngortitaatigut pisuttuarnini allaaseraa, pisuttuarninilu Game of Thronesip Ringenes Herrellu ataatsimoortinneqarneratut nassuiarpaa.

Sammisami pinngortitamut alutornartumut Kalaallit Nunaatalu sikuinnaallunilu aputaannaannginneranut tupaallaatinut tunngavoq.

Ilanngutassianut iserfissat knr.gl-ikkut nassaarisinnaavatit.