Amerikamiut assortuisunut aningaasaliisarsimasut
Silaannaap allanngoriartornerata unikaallatsinneqarnissaa pillugu Kyotomi nunat tamalaat isumaqatigiissutaannut assortuisup, Amerikamiut uuliasioqatigiiffissuata Exxon Mobilip isumalioqatigiissitaq Bruxellesimi inissisimasoq, CNE, tassa Europa nutaaq pillugu isumalioqatigiissitaq, siorna 800.000 koruuninik aningaasaliiffigisimagaa, tuluit avisersuanni The Independentimi allaaserineqarpoq.
- Silaannaap kissakkiartorneranut unikaallatsitsiniarlutik Europami siuttut suliniutaasa upperineerunnissaat anguniarlugu, amerikamiut uuliasioqatigiiffissuat suliniaqatigiinnut nalornilersitsiniartunut aningaasaliisarpoq, avatangiisit pillugit Europami misisueqqissaartartut siulittaasuat Oliver Hoedemann avisimut Independentimut oqarpoq.
Uuliasiorfissuarmit aningaasaaliifigineqarsimanertik pillugu CNE-p siulittaasua Stephen Pollard aperineqarami akivoq, Kyotomi isumaqatigiissut atorsinnaanngitsutut immikkoortitsisutut akisoqisutullu naliligartik pillugu kiffaanngissuseqartumik oqaaseqarsinnaatitaanissaq kissatigigitsik. Taamaattorli silaannaap kissakkiartornerata inuit mingutsitsinerannit pinngortuunera assortorsimanngisaannarnerarpaa.
