Amerikamiut aningaasaliissuteqarnerunissaat neriuutigaat
Suleqatigiinnissamik isumaqatigiissut Joint Committee 2004-imi Igaliku-mi isumaqatigiissuteqarnermi pilersinneqarpoq, Pituffimmi radarip atortuisa nutarterneqarnissaannik USA-p piumasaqarnera aallaavigalugu.
Joint Committeep Washingtonimi ataatsimiinnerani inuit 40-t missaanniittut ataatsimeeqataassapput, taakkua Kalaallit Nunaannit Danmarkimit USA-millu aggersuusut, aviisi Sermitsiaq nittartakamini allappoq.
Joint Committeep ataatsimiinnerani takornariaqarneq, avatangiisit, ilisimatusarneq, ilinniartitaaneq aningaasaliissuteqartarnerillu oqaluuserineqassapput.
Suleqatigiinnissamik piumassuseqartoqarpoq suleqatigiinnissamulli aningaasanik amigaateqarneq aporfiunerpaavoq.
Amerikamiut amerlanerusut Kalaallit Nunaanni aningaasaliissuteqarnerunissaat neriuutigineqarpoq. Alcoa alumiiniumik aatsitsiviliornissamut piareersarpoq, taannalu suleqatigiiffiup Joint Committeemik isumaqatigiissuteqarnerup kinguneranit aallaaveqarpoq. Suliffeqarfinnik aningaasaliisarfik Greenland Venture neriuppoq, Kalaallit Nunaanni pisariaqartinneqartut annertuut sanaartorneqarneranni Amerikamiunik aningaasaleerusuttunik naammattoorsissalluni.
Aningaasaqarnermut nunanullu allanut naalakkersuisoq Aleqa Hammond ataasinngormalli Washingtoniliarpoq, danskillu USA-mi aallartitaanik Arne Friis Petersenimik ataatsimeeqateqarpoq aamma USA-mi nunanut allanut naalakkersuisup tullersortaa Paula Dubriansky USA-p nunani issittuni isumaa pillugu ataatsimeeqatigineqartoq, Sermitsiaq nittartakkamini allappoq.
