Amerikamiu nukappiaraq 13-inik ukiulik rekordiliivoq
CNN-imi tamanna allaaserineqarpoq.
Nukappiaraq taanna - Jordan Romero-mik atilik - qaqqarsuarmut majuarnerani internetikkut nittartagaatigut sumiissusersiut GPS atorlugu malinnaaffigineqarsinnaavoq.
Romero qaqqarsuup qaavanut pigami nittartakkaminut ima allappoq.
- Takorluugara piviusunngorpoq.
Qaqqarsuarmulli majuarniarnera ajornartorsiorfiunngitsoorsimanngilaq. Tassami Romerop Mount Everest 8.847 meterinik portussuseqartoq Kiinamut sammisortaatigut majuartariaqarsimavaa, tassami Nepalimi oqartussat ukiukippallaarnera pissutigalugu qaqqarsuarmut majuarnissaa inerteqqutigisimammassuk.
Romero qaqqanut majuarnermik nuannarisaqaannanngilaq, aammattaarli iliuutsimigut oqariartuuteqarluni, tassami taassuma Amerikamiut meerartaasa asimiinnerusalernissaat kajumissaarutigaa.
Romerop qulingiluaannarnik ukioqarluni, Afrikami qaqqaq portunerpaaq, Kilimanjaro, seks kilometerinik portussuseqartoq qaqivaa.
Mount Everestimut qaqinermigut, 13-inik ukiullip taassuma nunavissuit qaqqaat portunerpaat arfiniliusut qaqereersimalerpai, taamaallaallu Sikuiuitsumi Kujallermi qaqqat portunersaata qaqinissaa amigaatigilerlugu, taassumalu decembarimi qaqinissaa naatsorsuutigaa.
