Amerikami illoqarfissuarni neriniartarfiit matuneqartut

USA-mi inuit kateriffigisinnaasaat inunnit 50-init sinneqassanngillat, illoqarfissuarnilu killilersuisoqalerluni. Los Angelesimi New Yorkimilu imerniartarfiit, neriniartarfiit, isiginnaartitsisarfiillu matunissaannik peqquneqarput.

Illoqarfinni taakkunani borgmesterit, Bill de Blasio aamma Eric Garcetti, ataasinngornermi taama inassuteqarput.

Nualluut siaruatsaaliorniarlugu taama iliortoqarpoq.

Borgmesterit oqaatigaat, ilaatigut neriniartarfiit imerniartarfiillu nerisassanik sassaallissagunik annissassanik taamaallaat neqeroorsinnaatitaasut.

New Yorkimi neriniartarfiit 50.000-init amerlanerusut marlunngornermi ullaakkut matunissaat naatsorsuutigineqarpoq, matusisoqarneranilu sulisut 800.000-it sinneqartut eqqugaassapput.

Las Vegasimi akunnittarfiit 14-it aningaasanoortarfiillu marlunngornermi matuneqartussanngortut, Los Angeles Times taama allaaserisaqarpoq.

Tamatuma saniatigut takutitsinissarpassuit taamaatinneqareerput.

Coronavirusimik USA-mi tunillatsissimasut 3000-it sinnerlugit amerleriarput, ullup ataatsip iluani inuit 800-t tunillatsissimasut nalunaarsorneqarput. Taakkunani 200-t New Yorkimeersuullutik.

Amerikallu illoqarfissuani, New Yorkimi atuarfiit matuneqarput, katerinnerittoqarneranilu inuit 50-it sinneqqusaanatik killilersuinerlu sapaatit akunnerinik arfineq pingasunik sivisutigissalluni.