Ameerniarsinnaannginneq piniartunut sakkortuvoq

Mattusssaaneq Maniitsumi piniartunut aningaasaqarniarnikkut malunniutilereerpoq, Aasianni aamma ukiup sinnerani sunniuteqarnerlussasoq oqaatigineqarpoq.

- Puisit amiinik tunisinissamut matusineq uagutsinnut kipiluttunarpoq.

Aningaasatigut uagutsinnut eqquerujussuarpoq. Maniitsumi piniartoq Vilhelm Malakiassen oqarpoq. Maniitsumi piniartut kalaalimineerniarfik kisiat isumalluutigigaat taanna oqarpoq.

Taamaammat puisit amiinik tunisisinnaajunnaarneq malunniuteqaaq. Vilhelm Malakiassen-ip sapaatip akunnerani puisit amiinik tunisiffiunngitsumi ammit 15-it missaat igissimallugit unnerpaa. Tassalu ameq ataaseq 310 koruuneqarmat 4.500 koruunit missaat annaareerpai.

- Piniartut allanik pisaqartanngiffianni, puisit amiinik matusineq piniartunut eqquerujussuarpoq, Vilhelm Malakiassen oqarpoq.

Taanna KNAPK-p siulittaasuatulli isumaqarpoq, puisit amiinik tunisisinnaajunnaarnissaq marsip naaneranut utaqqisinneqarsimasariaqaraluartoq, taamanikkussaq nipisat suaannik tunisineq aallartissammat.

Aasianni Aalisartut Piniartullu Peqatigiiffianni ilaasortat 40-t missaanniipput, taakkuali tamarmik maanna piniarnermik inuussutissarsiorput, aalisakkanut tunitsivissaqannginneq pissutigalugu.

Aasianni maanna qilalugarniarneq annerusumik ingerlanneqarpoq. Kisianni ukiup sinerani puisinniarneq puisillu amiinik tunisineq Aasianni piniartunut isertitsilluaataasarpoq

- Puisit amiinik tunisisinnaajunnaarnikkut, Aasiaat illoqarfianni piniartut aningaasanik isertitsisinnaanerat unitsinneqarpoq, Godmann Fleischer oqarpoq. Taanna puisit amiinit tunisaminit siorna 30.000 koruunit missaannik isertitaqarpoq. Ukioq manna amminit isertitaqanngitsoornissaq Aasianni piniartunut malunniuteqarluassasoq, Godmann Fleischerip unnerpaa.

- Puisit amiinik tunisinissatsinnut ammaanneqanngikkutta, isertitaaruttussaavugut. Aningaasat annaajumaakkatta taarserniarnissaanut qanoq iliornissarput massakkorluinnaq nalugallarparput, Aasianni piniartoq Godmann Fleischer oqarpoq.