Politikki Inuussutissarsiutit Avatangiisit Kulturi

Amaqqut eqqissisimatitaajunnaarnissaat nuannaarutigineqartoq

Amaqqut Avanersuarmi siornatigut takussaanngikkaluartut maanna takussaalersimapput, piniagassat sumiiffimminnit allanut nuttalernerannik kinguneqartumik. Siorapalummi sunngiffimmi piniartoq taama oqaluttuarpoq.

Allattoq Jaaku Lyberth

septembarip 07-at 2017 07:24

Taamaammat eqqissisimatitaanerisa atorunnaarsinneqarnissaat Naalakkersuisut siunnersuutiginiarmassuk taassuma nuannaarutigaa

Aamma atuaruk Amaqqut piniagaalernissaat Naalakkersuisut ammaakkusukkaat

- Eqqissisimatinneqarunnaarnissaannik tusarniaasoqalermat tamatta Avanersuarmiut nuannaajallappugut, akornutitummi isigigatsigit, saniatigooralugu pinialuttartoq Ilannguaq Hendriksen Siorapalummi najugalik taama oqarpoq.

Ilannguaq Hendriksenip Siorapalummi amaroq siorna toquttariaqarsimavaa. Asseq: Arnannguaq Miunge

Taanna nunaqarfimmini amaqqumik siullermik siorna takuvoq.

Amaqqut Avanersuarmi maanna takussaanerulersimapput.

- Meeranitta nalaani amaqqut tusarsaanngillat, ukiunili makkunani tusarsaalerput takuneqartarlutillu, Hendriksen oqarpoq. Tamatuma malitsigaa tuttut Siorapaluup avannarpasinnerusortaani najugannaaminnit allanut nuuttalersimammata.

-Tuttut kujavarterput, Qaanaap Qeqertallu eqqaani tuttut amerlisimasut tusaamavarput,
Ilannguaq Hendriksen taama oqarpoq.

Taassuma amaqqut amerlippata piniagassatik nungussasut ernummatigaa.

- Siunissaq eqqarsaatigalugu amaqqut amerlatsikkaluttuinnarpata uumasuutiginagillu iluaqutaanatillu, neqissagut amaqqut nerisalerpatigit kalaaliminertugassaarutissaagut, Ilannguaq Hendriksen taama oqarpoq.

Aamma atuaruk Naalakkersuisoqarfiup amaqqut piniarneqarsinnaanissaat sulissutigigaa

Amaqqut eqqissisimatitaanerisa atorunnaarsinneqarnissaannut Naalakkersuisut tusarniaanerat septembarip ulluisa 29-annut killeqarpoq.