Amagerbankip ajalusoornera politikkikkut kinguneqartinneqassaaq

- 6,7 milliardit koruuninik annaasaqarsinnaavugut. Piginneqatigiit aningaasaliissutaat annaaneqarput, taassumalu saniatigut qanoq annertussusaanik nalusatsinnik annaasaqarluta, soorunalimi annaasassat annikinnerpaanissaat sulissutigissavarput, aningaasaqarnermut ministeri Claus Hjort Frederiksen oqarpoq.

Aningaasat annaaneqartut qanoq annertutigineri ullumikkut nalilerneqarsinnaanngilaq, aningaasaqarnermut ministeri oqarpoq, eqqaasissutigalugulu naalagaaffik aningaaserivinnut ikiorsiissutigisimasani pingasut aningaasarsiorfigisimagai. Taamaakkaluartoq naalagaaffik Amagerbankenimullu piginneqataasut aningaaseriviup ajalusoornerata kingorna aningaasanik annertuunik annaasaqarput, tamannalu pillugu partiit assigiinngitsut qanoq pisoqarsimaneranik misissuisoqarnissaanik piumasaqarput. Misissuisoqassaarlu, aningaasaqarnermut inuussutissarsiornermullu ministeri Brian Mikkelsen oqarpoq.

Amagerbankenimut piginneqataasut, arlaleria aningaasaliisimasut, aningaasaatitik annaavaat:

Amagerbankenimut piginneqataasut 70.000-it ugguarput, piginneqataasut siulittaasuat Jørgen Kristensen oqarpoq.

- Isumaqarpunga piginneqataasut salloqittarneqarsimasut, maannamullu aningaaserivik annaanniarlugu millionilikkaanik aningaasaliisimasut, Jørgen Kristensen oqarpoq.

Aningaaserivik marloriarluni piginneqataasunut aningaasaleeqqusisimavoq. Kingullermik ukiaq manna, taamanilu 900 millionit koruuninik aningaasaliisoqarpoq.

Piginneqataasut maanna misissorpaat aningaaserivimmut aqutsisuusimasut annaasaminnut akisussaasuutinneqarsinnaanersut. Aningaasaatitilli tigoqqinnissaanut neriuuteqassanngitsut Lars Bo Langsted Aalborg Universitetimi aqutsinermi akisussaaffinnut ilisimatooq oqarpoq.