Aluu Airlinesip isumaqatigiissummik tunineqannginnini uggoraa

Aluu Airlines kisiartaalluni Namminersorlutik Oqartussanit isumaqatigiissuteqarfigineqanngilaq. Timmisartortitseqatigiiffiullu pisortaanerata tamanna pakatsinartillugulu paasiuminaatsippaa.

- Ukiarli suliffeqarfiit innuttaasullu angalasartut tusarniariartorlugit angalanikuuvugut. Taakkulu kissaataat najoqqutaralugit neqeroorusiornikuulluta, Pele Broberg, Aluu AirLinesimi pisortaaneq oqarpoq.

Aamma atuaruk VIDEO Aluu Airlines timmisartornerup akikinnerulernissaanik neriuuteqalersitsivoq

- Umiatsianut uteqqikkusuttoqarnissaa naatsorsuutiginikuunngilarput. Taamaammat tupigusuutigaarput timmisartunik qulimiguulinnik suluusalinnillu angallassinissamut neqeroorusiornissamut ilaatinneqarsimagatta, Aluu Airlinesip pisortaanera Pele Broberg taama oqarpoq.

Aluu Airlinesip assartuussinissamik suliassanut tamanut neqeroorsimavoq, Qeqqani imaatigut assartuussinissaq minillugu.

Air Greenland, Disko Line aamma islandimiut timmisartortitseqatigiiffiat Nordlandair assartuussineq pillugu kiffartuussinissamik marlunngormat isumaqatigiissuteqarfigineqarput. Kiffartuussinissamik isumaqatigiissutit ukiumut 123 millionit koruuninik naleqassapput.

Kiffartuussisussat tassaapput:

Assartuussinissamik suliassaq 1: Qaanaaq, Air Greenland
Assartuussinissamik suliassaq 2: Upernavik, Air Greenland
Assartuussinissamik suliassaq 3: Uummannaq, Air Greenland
Assartuussinissamik suliassaq 4/5: Qeqertarsuaq Qeqertarsuullu tunua, Disko Line
Assartuussinissamik suliassaq 6: Qeqqa, Disko Line
Assartuussinissamik suliassaq 7: Kujataa, Disko Line
Assartuussinissamik suliassaq 8: Tasiilaq, Air Greenland
Assartuussinissamik suliassaq 9: Ittoqqortoormiit, Air Greenland
Assartuussinissamik suliassaq 10: Avannaa (Qaanaaq-Upernavik), Air Greenland
Assartuussinissamik suliassaq 11: Tunu, Norlandair