Aluminiumik aatsitsivissaq naliliivigineqarluarpoq
Ilaatigut assersuutitut taaneqarpoq nunarsuarmi CO2-mik aniatitsineq aatsitsivimmik Nunatsinni inissiinermi pingasoriaammiit aqqaneq marloriaammut annikinnererussasoq. Soorlu aatsitsivik Kinami inissisimagaluarpat aluminiumik kiilumik nioqqutissiornermi CO2 29,7 kilo aniatinneqartassagaluarpoq, - Nunatsinni CO2 5,9 kiiluinnaq aniatinneqartoq, nunatsinni aniatitsinerup mikinerunissaa erngup nukinganik atuinermik peqquteqartussaavoq.
Ineqarnermut, Attaveqarnermut Angallannermullu Naalkkersuisoqarfimmi atorfilik Steen Egede aperineqarpoq, nalunaarusiaq Maniitsumi aluminiumik aatsiterivissamut pilerisaarutaannaannginnersoq, akivorlu:
- Taama isumaqannghilagut. nalunaarusiarmi aluminiuliornissamut ajunngitsumik isigititsisinnaavoq, kisianni immikkoortut ilaannakuugamik, taavalu immikkoortut allat pineqartut, soorlu pinngortitamut, avatangiisinut peqqinnissamut sunniutaasinnaasut, imaassinnaavoq allatut oqariartuutillit.
Nalunaarusiat immikkoortui allat kingusinnerusukkut takkuttussat sunik imaqarniarnersut Steen Egedemut apeqqutigigatsigu akivoq:
- Immikkoortut arfineq-marluupput, tassani pineqassapput pinngortitaq, avatangiisit, peqqinnissaq, nunap immikkoortortaani ineriartorneq, kulturi, taavalu immikkut sammisaqartussaassapput avatangiisinut sunniutaasinnaasut, soorlu uumasut sunnerneqarnerat immikkut sammisussaassavaat.
CO2 700.000-sit missaanniittoq Nunatsinni ullumikkut ukiumut aniatittarparput. Alcoallu aluminiumik aatsitsivissaa aallartissappat Nunatsinni CO2-mik aniatitsinerput 597.000 tonsinik qaffassaaq.
