Aluminiuliorneq 2014-imi aallartinneqarsinnaassaaq

Aallartisarnissap takorloorneqarnera naapertorlugu imermik nukissiorfiit atorneqartussat sananeqarneri siusinnerpaamik 2010-mi aallartinneqarsinnaassapput. Suleriaasissaq takorloorneqartoq naapertorlugu taamaammat aluminiuliorfiup aallartissinnaanissaa ukiup 2014-ip naalernerani pisinnaassaaq. Suliassalli ingerlanissaanut piffissaliunneqartut suli assigiinngitsut pissutigalugit kinguartinneqarsinnaapput, soorlu avatangiisinut sunniuteqarnissaa suli misissorneqarallartussaavoq piffissallu ingerlanerani inatsisartunut qinersisoqassappat aamma suliassanik kinguartitsisoqartussaassaaq.

Pissutsit maannakkutut isikkoqartillugit Inatsisartut aappaagu ukiakkut ataatsimiinnerminni akuersissuteqassanerlutik aalajangivissortussaapput. Inatsisartullu upernaamut ataatsimiilerunik Alcoamut tunngasut eqqartulereertussaagaat, Suliffeqarnermut Naalakkersuisoqarfimmi allaffimmioq, Jakob Mathiassen oqarpoq.

Aluminiuliorfiup aallartinneqassaguni Sisimiuni, Maniitsumi Nuummiluunniit sananeqassanersoq Inatsisartut marsimi siullermik eqqartussavaat, aappassaaneerneqarneralu aprilimi pissaluni. Aluminiuliorfimmut tunngatillugu aamma kikkut sunik qanorlu atsigisunik piginneqataassanersut upernaamut Inatsisartut ataatsimiinnerminni eqqartortussavaat. Soorlu takorloorneqarsinnaavoq imeq atorlugu nukissiorfiit kabelillu, kallerup innerata ingerlavissai, Namminersornerullutik Oqartussanit pigineqartut Alcoalu aluminiuliorfimmik piginnittutut ingerlassilluni, aammali imaassinnaavoq piginneqartaanermut tunngasut imaalisut suliassaq tamaat ataatsimut isigalugu kikkut qanoq atsigisumik piginneqataassanersut aalajangerneqartoq, Jakob Mathiassen Suliffeqarnermut Naalakkersuisoqarfimmi Alcoa pillugu allaffeqarfimmiit nalunaarpoq.

Naalakkersuisut Alcoamik isumaqatigiinniarnerat Nukissiorfiit pisortaannit, Svend Hardenbergimit Greenland Development sinnerlugu ingerlanneqarput.