Aluminiu mingutsitsissanersoq pillugu nalunaarusiortoqarpoq
Nalunaarusiaq taanna ullumimiit januaarip 15-iata tungaanut susassaqartunut tusarniaassutigineqartussaavoq.
Nalunaarusiamik suliarinnittut siuttuata Klaus Georg Hansenip oqaatigaa nunatsinni alumiiniumik aatsitsisoqassappat ajoqutai ajunngequtaalu nalunaarusiami erseqqissaatigineqartut.
- Alumiiniuliorfimmik pilersitsinissamik suliaq annertoorujussuuvoq aatsaallu taamak suliffissuarmik annertutigisumik maani nunami pilersitsisoqarnialersaarpoq. Taamaattumik politikkikkut aalajangiivigineqarpoq, aalajangivittoqannginnerani iternga tikillugu misissueqqissaartoqassasoq, taama oqarpoq nalunaarusiortoqarneranut siulittaasoq Klaus Georg Hansen.
Nunarpulli nunatut minguitsutut taaneqartartoq mingutsinneqartussanngornerpa?
- Taamaaqqissaartariaqanngilaq, tassami alumiiniuliornermi sanaartukkap ilaa mingutsitsisinnaavoq ilaali aamma mingutsitsinerunani. Mingutsitsinngitsortaalu nunatsinniittussaassaaq, taannalu nukinnik atuisorujussuusussaammat nunatsinniittussanngortinneqarpoq, Klaus Georg Hansen nassuiaavoq.
Nalunaarusiami kapitalit arfiniliusut imaraat pinngortitaq mingutsinneqariataassagaluarpat qanoq kinguneqaratarsinnaanersoq taamatuttaaq avatangiisit, peqqissuseq, immikkoortortaqarfikkutaat, ineriartortitsineq kiisalu misissugassat immikkuullarissortaasa suunerat.
