Alumiiniumik aatsitsivissamut nunarput aningaasaliisariaqarpoq

Aappaagumut aningaasanut inatsisissatut siunnersuutaagaluartumi Alcoamut Nunatsinnit aningaasaliissutissatut 370 mio. kr.-nit siunnersuutaapput. Inatsisartut ukiaanerani ataatsimiinnerat ammarnersiorlugu oqallinnermi, Nunatta taama pituttorneqartiginera partiinit arlalinnit isornartorsiorneqarpoq.

Inuussutissarsiornermut naalakkersuisoq, Siverth K. Heilmann, kingornatigut Inatsisartunut ilisimatitsivoq, alumiiniumik aatsisivissaq pillugu misissueqqaarnernut Nunatta aappaagu aningaasartuutissai 180 - 190 mio. kr.-ininut ikilineqarsinnaasut, misissueqqaarnerit sivitsornermata.

Nunarput pilersaarummut suli akuerineqanngitsumut aningaasaliisariaqarneranut pissutaavoq, Namminersornerullutik Oqartussat Alcoalu maajip 15-ani 2007-mi paaseqatigiillutik isumaqatigiissusiormata, Alcoa-p pilersaarummut piviusunngunngitsoorsinnaasumut aningaasaleeriataarsinnaaneranik pinngitsoortitsisussamik.

Greenland Development Alcoa-mut isumaqatigiinniartuuvoq. Pisortaaneq, Flemming Drechsel nassuiaavoq, inatsimmik tunngaveqanngikkaluarluni pilersaarutip aallartinnissaa tassani siunertaasoq. Erngummi nukinganik atuinissamik akuersissuteqartarnermut Nunatsinni inatsiseqanngilaq.

- Alcoa sattattutut illuni aningaasartoqaaq, Namminersornerullutik Oqartussat peqatigalugit pilersaarummik aallartitsilluni, Flemming Drechsel oqarpoq.

Misissueqqaarnernut aningaasartuuterpassuit avinneqarnissaannut apeqqutaavoq, alumiiniuliorfiliassamut Nunarput piginneqataassanersoq, Alcoaluunnit akuersissuteqarluni kisimi ingerlatsissanersoq. Nunarput piginneqataassaguni aningaasartuutit affai akilissavai. Alcoa-li kisimi ingerlatsissaguni aningaasartuutit tamaasa akilissavai.

Nunarput Alcoa-mik piginneqataassanersoq, Inatsisartut aappaagu ukiakkut isummerfigissavaat, pilersaarullu ilumut piviusunngussanersoq aatsaat 2010-mi aalajangiiffigineqassasoq ilimagineqarpoq.

Kisianni erngup nukiganik iluaquteqarnermut akuersissuteqartarnissamut inatsisissaq ukiaq manna siullermeerneqassaaq.